MPONDA WATSOGOLERA LEOPARDS KU CHIPAMBANO CHINA

Katswiri wakale watimu ya Flames, Peter Mponda akuchita bwino ngati mphunzitsi tsopano kutimu ya Black Leopards pomwe wayitsogolera ku chipambano chachiwiri mu ligi ya Motsepe Foundation Championship ku South Africa.

Leopards yagonjetsa JDR Stars 2-0 ndi zigoli za katswiri waku Namibia, Bethuel Muzeu kuti timuyi isunthe kwambiri mu ligiyi. Mmasewero, katswiri waku Malawi, Raffick Namwera, ndiyemwe anali mtsogoleri wa osewera a Leopards.

Zateremu, timuyi ili ndi mapointsi 7 pa masewero asanu ndi amodzi (6) ndipo yafika pa nambala khumi pa matimu 16.

Mponda anatenga ntchitoyi sabata yatha pomwe mphunzitsi watimuyi anamuchotsa ndipo tsopano waipezetsa timuyi zipambano ziwiri mu ligiyi.

#Tawonga2023

CIVO YALEMBERA SULOM PA MLANDU WA MOYALE

Timu ya Civo United yalembera kalata bungwe la Super League of Malawi kuti lilowepo ndikuunikira nkhani yoti timu ya Moyale Barracks inalowetsa osewera yemwe anali ndi makalata achikasu atatu ndipo samayenera kusewera.

Timuyi yachita izi atatha masewero omwe anagonja 1-0 ndi chigoli cha Charles Nkhoma zomwe zawapangitsa kuti akhalebe ku chigwa cha matimu otuluka.

Mmasewerowa, Clifford Chimulambe wa Moyale Barracks, anali mu gulu la osewera omwe analowa mmasewerowa koma samayenera ndipo Moyale inamutulutsa patangotha mphindi ziwiri zomwe zinapangitsa Civo kufufuza.

Zateremu, Moyale ili pa chiopsezo cholandidwa ma pointsi onse atatu omwe atha kupereka ku Civo kamba ka mlanduwu.

#Tawonga2023

Good work #maule today

👉👉

KULIBE MANTHA KU SCORCHERS

Mphunzitsi watimu ya Scorchers, Lovemore Fazili, wati palibepo mantha aliwonse omwe akuoneka mu timu yake pomwe tsopano amaliza zokonzekera zonse kuti akumane ndi South Africa lachitatu mu mpikisano wa COSAFA.

Iye amayankhula izi patsogolo pa masewerowa ndipo wati zokonzekera zonse zatha bwino ndipo akukhulupilira kuti achita bwino mmasewerowa.

"Tinayenda bwino kuchoka kumudzi kufika kuno tinapanga zokonzekera dzulo, leronso tapanga zina kuziongola ndi kukonza mwina motsalira. Palibe mantha aliwonse Poti tikukumana ndi eni khomo ndipo kupambana mmasewerowa kutithandiza kuchulukitsa mwayi ofika ndime zina." Anatero Fazili.

Masewerowa ayamba nthawi ya 15:30hrs masana ndipo akhale oyamba mu gulu lawo.

#Tawonga2023