PANTHERS IKUYANG'ANA ZOKAFIKA NDIME YOTSIRIZA

Mphunzitsi watimu ya Panthers, Misheck Kachika Jere, wati timu yake yaika maso ake polimbikira kuti mwina ikafike mu ndime yotsiriza ya mpikisano wa Castel pomwe wati zilichonse ndi chotheka mu mpira.

Iye amayankhula atatha masewero omwe agonjetsa timu ya Silver Strikers 3-4 pa mapenate kutsatira kulepherana 2-2 mu mphindi 90 ndipo anali wosangalala kwambiri.

Iye anati timu yake sikuti imachita kukonza kuti izigo matimu akuluakuluwa mu ndime ya mapenate pomwe zimangochitika koma wati akufuna akathere patali.

"Zikupereka chilimbikitso kwambiri kuti tinagonjetsa MAFCO apa tagonjetsa Silver Strikers nde tingolimbikira kuti tifike patali mwina ndime yotsiriza poti chilichonse ndi chotheka mu mpira." Anatero Jere.

Zateremu, timuyi yafika mu ndime ya matimu khumi, asanu ndi imodzi (16) ya mpikisanowu ndipo pakhale mayere kuti timuyi idziwe yemwe adzakumane naye.