"ANYAMATA ATHU ASEWERA BWINO KWAMBIRI" - KANANJI

Mphunzitsi watimu ya Bangwe All Stars, Eliya Kananji, wathokoza anyamata ake kuti asewera bwino kwambiri zomwe zawathandizira kuti afike mu ndime ina ya chikho cha FDH Bank.

Iye amayankhula atatha masewero omwe agonjetsa timu ya Silver Strikers 5-3 pa mapenate masewero atatha 0-0 mu mphindi 90 ndipo wati timu yake yachita bwino kwambiri.

"Tithokoze Mulungu chifukwa choti tasewera ndi Silver Strikers ndipo tithokoze osewera athu kuti asewera bwino kwambiri tinawauza kuti alimbikire poti anatitulutsa mu ndime ya matimu asanu ndi atatu mu chikho chomwechi chaka chatha nde tibwenze, zathekadi." Anatero Kananji.

Timuyi tsopano yafika mu ndime ya matimu khumi asanu ndi imodzi (16) ndipo ndi timu yachiwiri kuchokera ku ligi yaing'ono kugonjetsa timu yamu Supa ligi.

"IFEYO SI PA MPUNGA PA SILVER" - KANANJI

Mphunzitsi watimu ya Blue Eagles, Eliya Kananji, wati timu yawo ifunitsitsa itafika patali mwinanso nkutenga chikho cha FDH Bank ndipo anthu asayiphweketse poti ali ku Chipiku.

Iye amayankhula patsogolo pa masewero awo ndi timu ya Silver Strikers mu ndime ya matimu 32 amu chikhochi ndipo wati iwowa sipampunga pa Silver kamba koti akadali ndi mphamvu.

"Akakhala masewero ovuta kwambiri poti ndi amu chikho nde timu iliyonse imakhala yokonzeka kuti ichite bwino, poti tikumenya ku Chipiku anthu asatichepetse ifeyo tikuyang'ana kuti tikachite bwino koma ndi masewero ovuta kwambiri." Anatero Kananji.

Iye anati timu yawo sinagonjeko mu ligi yawo komanso mu zikho zina zimene asewera pomwenso Silver Strikers sinagonjeko mu TNM Supa ligi zomwe zivutitse masewerowa.

Timu imene ingagonje mmasewerowa omwe adzaseweredwe pa bwalo la Nankhaka udzatulukira mu mpikisanowu ndipo wopambana adzapitilira.

📷: Blue Eagles media

"KUKHALA CHETEKO NDEKUTI TIKUFUFUZA" - BANDA

Mlembi wamkulu wabungwe la Super League of Malawi, Williams Banda, wayankhulapo pa kudandaula kwa timu ya Blue Eagles kuti bungweli silikuyankhabe pa dandaulo lawo chifukwa choti likufufuza.

Banda wayankhula izi kutsatira kudandaula kwa Blue Eagles kuti SULOM ikuchedwa kuwayankha koma iye wati angakhale Blue Eagles yomweyo ikudziwa malamulo okhudza nthawi yomwe bungwe lawo likhonza kuwayankhira.

"Dandaulo likafika ndekuti limapita Ku disciplinary komiti yomwe imayenera kuti ifufuze nde kuchedwako sikuti angokhala koma akufufuza. Zokhudza kuti tiyankha liti pali malamulo omwe angakhale a Blue Eagles akuwadziwa komanso inunso mukuwadziwa." Anatero Banda.

Blue Eagles inalembera SULOM kuti ifufuze zachinyengo pakati pa matimu achisilikali a Red Lions komanso Moyale Barracks omwe anathandizira kuti Blue Eagles ituluke mu ligi ya TNM.

"KODI ZIKUFUNIKA KUTI MAKOCHI TIZIKALOWA M'BWALO?" - KANANJI

Mphunzitsi watimu ya Blue Eagles, Eliya Kananji, wadandaula kuti timu yake inangopereka zigoli pomwe tsopano timuyi yatuluka mu chikho cha Castel atagonja 4-2 ndi Silver Strikers.

Kananji amayankhula atatha masewerowa ndipo wati sakudziwano kuti osewera aziwayankhula motani chifukwa akumachita zosiyana ndi zomwe akuuzidwa ngakhale timu yawo ikumasewera bwino.

"Tivomereze tagonja 4-2 ndi timu ya Silver Strikers, chibwana chimalanda olo mutatenga CR Socials zigoli zomwe tachititsa lero sangachinyitse, tangopereka zigoli nde zikumadabwitsa kuti mwina tizikalowa makochi m'bwalomo chifukwa kuwauza sindikudziwa kuti akuganiza bwanji akumapanga zina." Anatero Kananji.

Zateremu timuyi tsopano yamaliza chaka cha 2023 ndipo ayamba kukonzera umoyo wawo mu ligi yaying'ono ya Chipiku Stores ya chigawo chapakati atatuluka mu ligi ya TNM.

Wolemba: Hastings Wadza Kasonga Jr

"TIKUYANG'ANA CASTEL NDIPO AMENEYU TIMWA NDITHU" - KANANJI

Mphunzitsi watimu ya Blue Eagles, Eliya 'Carlsberg Cup' Kananji, wati timu ya Blue Eagles sipita mophweka pomwe akukumana ndi timu ya Silver Strikers mu chikho cha Castel ndipo wati timu yonse ikuyang'ana pa chikho chomwechi.

Iye amayankhula izi patsogolo pa masewerowa pa bwalo la Bingu lachitatu ndipo wati timu ya Silver Strikers isapite moderera kuti iwo anatuluka kamba koti apita ndi mtima onse.

"Ndi masewero ovuta kwambiri ndipo anzathuwo asabwere mophweka kuti mwina poti tinatuluka mu ligi koma kukubwera January anyamata akufunikira ka ndalama koti atuluke nako nde ife maso athu ali pamenepa Castel ameneyu timwa ndithu." Anatero Kananji.

Iye wati anyamata ake anachivomera zoti atuluka mu ligi ndipo onse chidwi chili pa masewero amenewa. Omwe apambane mmasewero amenewa adzakumana ndi Bangwe All Stars mu ndime ya matimu anayi.

Wolemba: Hastings Wadza Kasonga Jr