Osewera atatu a Red Lions, Matamando Matchipitsa, Precious Mitolo komanso Mphatso Magaleta apikisana pa mphoto ya osewera yemwe wasewera bwino kuposa anzake mu mwezi wa May.

Wopambana pa mphotoyi ndi yemwe atalandire mavoti ochuluka ndipo alandira K300,000.

RED LIONS YALOZA CHALA OYIMBIRA ITAGONJA KOYAMBA

Timu ya Red Lions yaloza chala oyimbira pa masewero awo ndi Karonga United kuti wawaonongera masewero kupangitsa kuti agonje koyamba mu ligi ya FDH Premiership.

Mphunzitsi watimuyi, Malumbo Mkandawire, anayankhula zimenezi atagonja 1-0 ndipo wati oyimbira ndi yemwe anaonetsetsa kuti agonje ndithu mu masewerowa.

"Sindikufuna kuyankhula zambiri, aliyense waona momwe oyimbira achitira. Chigoli chija ndi chabwinobwino koma ziganizo za oyimbira ndi zomwe zaononga masewerowa," anatero Mkandawire.

Iye anakananso kuthilira mlomo pa momwe timuyi imakanikira kugwiritsa ntchito mipata yake ponena kuti zimachitika mu masewero.

Timu ya Red Lions yatsika kufika pa nambala yachisanu ndi chiwiri (7) ndi mapoints okwana asanu ndi anayi (9) pa masewero asanu ndi imodzi (6).

RED IKUTSOGOLERA NDANDANDA WA MPHOTO ZA OSEWERA BWINO

Timu ya Red Lions ikutsogola pa ndandanda wa matimu omwe atenga mphoto za osewera omwe asewera bwino pa masewero kochuluka kuposa timu iliyonse mu ligi ya FDH Premiership.

Timuyi yatenga mphotozi kasanu kusonyeza kuti yatenga mphotozi pa masewero aliwonse omwe asewera mu ligiyi.

Osewera awo omwe atengako mphotozi ndi Chembezi Chihoma, Matamando Matchipitsa, Henry Kamunga, Mphatso Magaleta ndi Shukuran Mussah.

Mphunzitsi watimuyi, Malumbo Mkandawire wati izi zikutanthauza kuti timuyi ilibwino mu chakachi.

"Zikungofuna kutionetsera kuti timuyi ilibwino mu chakachi komanso kuti osewera aliyense ndi wodalilika," anatero Mkandawire.

Matimu a Silver Strikers ndi Masters Security ndi omwe akubwera pachiwiri kamba koti atengako kanayi mphotozi koma Creck Sporting Club ndi Goshen City Dedza Dynamos sanatengeko mphotozi.

RED LIONS IKUKANA KUGONJA MU LIGI

Timu ya Red Lions ikupitilira kuchitabe bwino mu ligi ya FDH Premiership pomwe yagonjetsa LUANAR Mitundu 1-0 kuti akhalabe osagonja pa bwalo la Zomba loweruka.

Timuyi inakwanitsa kupeza chigoli kudzera mwa Henry Kamunga chomwe chinawathandizira kupata mapoints onse atatu kuti afike pa nambala yachitatu mu ligiyi.

Mphunzitsi watimuyi Malumbo Mkandawire wati ndi wokondwa ndi momwe osewera ake achitira mu masewerowa.

"Mitundu sinabwere moyesa nayo imafuna kudzapambana chifukwanso tinakumana mu ligi ya NDL koma tapambana zilibwino kwambiri," anatero Mkandawire.

Iye anati kuchita bwino Kwa osewera atimuyi mu masewero omwe asewera kukuonetsa kuti timuyi ilibwino kwambiri.

Red Lions yafika pa nambala yachitatu mu ligi pomwe ili ndi mapoints asanu ndi anayi (9) atapambana kawiri ndi kufananitsa mphamvu katatu.

3-1