"TIMAFUNITSITSA TITAPAMBANA" - MZUNGA

Mphunzitsi watimu ya MAFCO FC, Jimmy Mzunga, wati timu yake imafunitsitsa kupambana pa masewero awo ndi Mighty Mukuru Wanderers koma zavuta poti afanana mphamvu.

Iye amayankhula atatha masewero omwe analepherana 0-0 pa bwalo la Chitowe ndipo wati anyamata a Wanderers anatseka kwambiri kumbuyo kwawo zomwe zawavuta kuti asagoletse.

"Timafunitsitsa titapeza mapointsi atatu koma zativuta. Anzathu a Wanderers anatseka kwambiri kumbuyo kwawo zomwe zinachititsa kuti tisapeze chigoli." Anatero Mzunga.

Timu ya MAFCO yafika tsopano pa nambala yachisanu ndi chiwiri (7) pomwe ili ndi mapointsi okwana 20 pa masewero 14 omwe yasewera.

"MASEWERO ONSE TASEWERA BWINO" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati timu yake inasewera bwino kwambiri mmasewero awo ndi timu ya Karonga United zomwe zawathandizira kuti achite bwino.

Iye amayankhula atatha masewero omwe apambana 2-0 pa bwalo la Chitowe ndipo wati akufunitsitsa kuti azichita bwino pa masewero awo onse omwe azisewera mu ligi.

"Masewero abwino kwambiri tasewera bwino mchigawo choyamba komanso chachiwiri nde zatithandiza kuti tichite bwino nde ndife osangalala kwambiri." Anatero Mzunga.

Timuyi tsopano yafika pa nambala yachisanu ndi chiwiri (7) pomwe ili ndi mapointsi 19 pa masewero 13 omwe yasewera mu ligi.

"TIYESETSA KUTI TIZICHITABE BWINO" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati ndi wokondwa poti timu yake ikuchita bwino ndipo ayesetsa kuti azigwiritsa ntchito mipata yomwe azipeza kuti azipeza zipambano.

Iye amayankhula atatha masewero omwe agonjetsa Chitipa United 2-0 ndipo wati wathokoza osewera ake potsatira zomwe Iwo amawauza mmasewerowa.

"Anali masewero abwino tithokoze osewera athu kuti asewera bwino tapambana ndipo tiwalimbikitsabe kuti mwina tizichitabe bwino." Anatero Mzunga.

MAFCO tsopano ili pa nambala yachikhumi mu ligi pomwe yatolera mapointsi Khumi ndi awiri (12) pa masewero khumi (10) omwe yasewera.

"ANZATHU ANATIBALALITSA NDI MIPIRA ITALIITALI" - KUMWEMBE

Wachiwiri kwa othandizira mphunzitsi kutimu ya MAFCO, Macdonald Kumwembe, wati kugonja kwawo ndi timu ya Creck Sporting Club ndi kopweteka chifukwa sanayembekezere kuti zikhonza kuyenda choncho.

Iye amayankhula atatha masewero omwe agonja 1-2 ndi timu ya Creck ndipo iye wati timu yake inabalalika ndi maseweredwe a anzawowo omwe samasunga mpira koma kumenya wautaliutali basi.

"Ndi kugonja kopweteka kwambiri chifukwa sitinaganizire kuti zithers koma poti mpira wochinya zigoli zambiri ndi yemwe amakhala kuti wapambana. Anatisokoneza mmene anabwerera mchigawo chachiwiri chifukwa samapatsirana koma amamenya wautaliutali nde koma tikakonza tikabwerera." Anatero Kumwembe.

Timu ya MAFCO ili pa nambala yachikhumi ndi chitatu (13) pomwe ali ndi mapointsi asanu ndi anayi (9) pa masewero asanu ndi anayinso (9).

"TIMANGOFUNIKIRA CHIPAMBANO BASI" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati timu yake imangofunikira kungopeza chipambano ndipo tsopano ayamba kuchita bwino kwambiri mu ligi.

Iye amayankhula atatha masewero omwe apambana 1-0 ndi timu ya Bangwe All Stars lamulungu ndipo wati tsopano timuyi yanyamuka.

"Tachipeza chipambano chomwe timachifuna panopa nde tinyamuka chifukwa timangofunikira chipambano ngati ichi basi." Anatero Mzunga.

Timuyi yatuluka mu chigwa cha matimu otuluka mu ligi pomwe ali pa nambala 13 ndi mapointsi asanu ndi imodzi (6) pa masewero asanu ndi awiri (7) poti apambana kamodzi, kugonja katatu ndi kufanana mphamvunso katatu.