BULLETS YAKASUMA KU SRFA

Masewero omwe amayenera kukhalako lachinayi pakati pa FOMO FC komanso Zingwangwa United ayimitsidwa kaye pomwe bungwe la Southern Region Football Association likufufuza dandaulo la FCB Nyasa Big Bullets.

Bullets yakadandaula ku bungweli ati kamba koti osewera atatu a Zingwangwa anasewera ali ndi makadi achikasu awiri zomwe ndi zosaloledwa.

Iyo yati osewerawa ndi Zewu Nyaka, Madalo Tambula komanso Vitumbiko Nyirenda ndipo samayenera kusewera mmasewero achibwerenza omwe anagonja 1-2 pa bwalo la Kamuzu.

Mwa ichi, SRFA layamba kufufuza ndipo masewero ena pakati pa Ntopwa Airbase ndi Ntopwa apitilirabe. Nako ku chigawo chapakati, masewero otsiriza anaimitsidwa kamba koganizira zachinyengo.

Wolemba: Hastings Wadza Kasonga Jr

"CHIYAMBIRENI LIGI TAMENYAKO NDI TIMU YANZERU" - CHATAMA

Mphunzitsi watimu ya FCB Nyasa Big Bullets Reserve, Enos Chatama, wati timu yake yasewera masewero ovuta kwambiri chiyambireni mu ligi ya chaka chino pomwe wayamikira FOMO FC kuti ndi timu yabwino.

Iye amayankhula izi atatha masewero omwe timu yake yapambana 2-1 pa bwalo la Kamuzu ndipo wati nsi okondwa poti afika mu ndime ya matimu asanu ndi atatu ndipo maso ake azikonza za ndime imeneyi.

"Anali masewero ovuta kwambiri mwina tasewera masewero ambiri oti ena tinagonja koma lero tasewera ndi timu yabwino, tiwayamikire FOMO yamenya bwino makamaka mchigawo choyamba pomwe anatipanikizadi koma mchigawo chachiwiri nde tamenya. Ali ndi mphunzitsi wabwino ndipo tamenya ndi timu yoti ikudziwa chimene ikupanga." Anatero Chatama.

Mphunzitsiyu anati timu yake yaphonya kwambiri koma nzosadandaulitsa poti yatenga mapointsi omwe atsimikizira malo awo mu ndime Ina. Timuyi ili pa nambala yoyamba ndi mapointsi 36 pa masewero 18.

Wolemba: Hast

BULLETS RESERVE YAKANIKA KUBWERA PAMWAMBA

Akatswiri omwe akuteteza ligi yakummwera kwa dziko lino ya Thumbs Up Southern Region Football league, FCB Nyasa Big Bullets Reserve, akanika kufika pa mwamba pa ligiyi pomwe yagonja 2-0 ndi timu ya Waka Waka Tigers Reserve pa bwalo la Kamuzu lolemba masana

Timuyi inali ndi mwayi ofika pamwamba kutsatira kugonja kwa timu ya FOMO FC 1-0 ndi timu ya The Boys lamulungu ndipo inaona ngati kutulo pomwe Tigers yomwe ikuvutika mu ligi yawamenya pakhomo pawo pomwepo.

Timuyi yataya mapointsi asanu mmasewero awiri omwe yasewera mmasabata awiri apitawa pomwe anafanananso mphamvu ndi timu ya The Boys 1-1 sabata yatha.

FOMO ilamulirabe mu gulu B la ligiyi ndi mapointsi 29 pa masewero 13 pomwe Bullets Reserve ili pachiwiri ndi mapointsi 26 pa maseweronso 14, Ntopwa ili ndi 23 pomwe Zomba Airbase ili ndi 21 mu gulu lomweli.

#Tawonga2023