"NDILI NDI CHIKHULUPILIRO KUTI TIKAGOLETSA" - ZOYA

Wachiwiri kwa mphunzitsi watimu ya Civil Service United Emmanuel Zoya wati timu yake inayika chidwi chachikulu pa kugoletsa komanso kuchinjiliza mkati mwa sabatayi ndipo ali ndi chikhulupiliro kuti akagoletsa zambiri kuti apambane loweruka.

Iye amayankhula patsogolo pa masewero awo ndi Mighty Wanderers pa bwalo la Civo ndipo wati akuyembekezera kupeza chipambano pa masewerowa.

Iye anati timu yawo yakhala isakuchita bwino mu masewero awo angapo mu ligi koma akhala pansi ndi kuunikirana kufunika koti ayambe kuchita bwino.

"Takhala tikumachinyitsa kwambiri komanso kukanika kuchinya nde ndi zomwe anyamata akonzekeretsedwa patsogolo pa masewero moti tikachita bwino," anatero Zoya.

Iye anatinso timu yake yakhudzidwa ndi kuvulala kwa osewera chaka chino koma pamenepo sipakhala pothawira poti ali ndi osewera ochuluka.

Timuyi ili pa nambala 10 mu ligi pomwe ili ndi mapoints 11 pa masewero 9 omwe asewera mu ligi.

📷 Civil media

"NDI MOMWE TAKONZEKERERA MARAS ADZACHOKA AKUSANGALALA" - MAKAWA

Mphunzitsi watimu ya Civil Service United Abbas Makawa wamema otsatira timuyi kuti abwere mwamkokomo pabwalo la Civo chifukwa choti sadzachoka atakhumudwa pakutha pa masewero.

Iye amayankhula patsogolo pa masewero omwe akukumana ndi Silver Strikers mu sabata yachisanu ndi chiwiri yamu FDH Premiership loweruka pakhomo pawo.

Iye wati akudziwa kuti akhala akuvutika ndi Silver chaka chatha koma ayesetsa mu masewerowa kuti akwanitse kuchita bwino.

"Takonzekera bwino kuti tidzachite bwino chifukwa takhala tikuvutika mu masewero angapo komanso anzathuwo akhala akuchita bwino kusonyeza kuti ndi masewero ovuta koma tidzayesesa," Iye anatero.

Makawa anatinso timu yawo yakwanitsa kukonza kutsogolo kwawo komwe kunali mavuto kamba koti amakwanitsa kupeza mipata koma amakanika kugoletsa.

Civil ikulowa mmasewerowa ili pa nambala 11 mu ligi pomwe ili ndi mapoints asanu ndi awiri (7) pa masewero asanu ndi imodzi.

CIVIL IKUFUNITSITSA KUCHITA BWINO KOYENDA

Mphunzitsi watimu ya Civil Service United, Abbas Makawa, wati timu yake ikufunitsitsa kuti igoletse zigoli zodutsa ziwiri pa masewero awo oyamba mu chikho cha Airtel Top 8 kuti asadzavutike mu masewero awo achibwereza pakhomo.

Makawa amayankhula patsogolo pa masewero omwe akumane ndi Blue Eagles mu ndime ya matimu asanu ndi atatu pa masewero oyamba pa bwalo la Bingu mu mzinda.

Iye wati akudziwa kuti timu yake ikuvutika mu ligi pomwe agonja masewero atatu otsogozana koma masewero amu chikho amakhala osiyana kwambiri ndipo akuyembekeza kuti achite bwino.

"Tikufunitsitsa kuti tigoletse zigoli ziwiri kapena zambiri kamba koti tili koyenda ndiye kuti pakhomo zitha kudzatiphwekera. Ndi zosiyana kuti Blue Eagles imangosewera masewero pa bwalo la Civo pomwe ifeyo timayambira pokonzekera nde sizoopsa mmasewero achibwerenzawo," anatero Makawa.

Ndipo mtsogoleri wa wosewera kutimuyi, Righteous Banda, wati akuyembekezera kukhala ndi masewero ovuta

CIVIL YAGONJA KATATU KOTSATIZANA MU LIGI

Timu ya Civil Service United yagonja katatu kotsogozana mu ligi ya FDH Premiership kusiyana ndi momwe anayambira mu masewero awo atatu oyamba pomwe agonja 3-0 ndi LUANAR Mitundu pa bwalo la Dedza loweruka.

Timuyi inakwanitsa kupeza mapoints asanu ndi awiri pa masewero awo oyamba koma yagonja ndi Chitipa United, Karonga United ndiponso apa Mitundu kuti ataye mapoints ochuluka.

Wachiwiri kwa mphunzitsi watimuyi, Emmanuel Zoya, wati timu yake yavomereza kugonja kamba koti Mitundu inali bwino paliponse.

"Zikutivutadi koma tikungoyenera tibwerere tikaunikire kuti pakutivuta ndi pati koma ndikutsimikiza kuti tibwereranso mwa mphamvu," anatero Zoya.

Iye anatinso kuvulala kwa China Chirwa komanso wotchinga pagolo Rahaman John kunawasokonezanso mmasewerowa kamba koti sanakonzekere kusewera opanda akatswiriwa.

Timu ya Civil tsopano yatsika kufika pa 10 pomwe ili ndi mapoints okwana asanu ndi awiri pa masewero asanu ndi imodzi.

"NGATI MPIRA KU MALAWI UKUONONGEKA NDI OYIMBIRA" - MAKAWA

Mphunzitsi watimu ya Civil Service United, Abbas Makawa, wati oyimbira a mdziko muno akuononga mpira kwambiri ndi kayimbilidwe koipa kopondereza matimu ena ndipo akanakhala kuti amasewera kwawo akanatha kupambana 5-0 ndi Chitipa United.

Iye amayankhula atatha masewero omwe timu yake yagonja 1-0 ndi timu ya Chitipa United pa bwalo la Chitipa kukhala masewero oyamba kuti agonje chaka chino ndipo wadandaula kwambiri ndi oyimbira.

Iye wati ngati matimu ena ali abwino azikwanitsanso kupambana koyenda osati pakhomo pokha chifukwa choti amathandizidwa ndi oyimbira.

"Atichinyadi chigoli chabwinobwino chopanda vuto inde koma kayimbilidwe kake koseketsa kwambiri. Tinapeza chigoli chabwinobwino koma anachikana amadziwa kuti tikatsogola akanika kubweramo akunowa, Ife tasewera bwino palibe chovuta koma kuyimbiraku ndi komwe katipweteka," iye anatero.

Iye wapempha kuti oyimbirawa kuti akhale opanda mbali zomwe zithandizire kumapereka chi