"TILIMBIKIRA MASEWERO OMWE ATSALAWA" - MASAPULA

Wachiwiri kwa mphunzitsi watimu ya Red Lions, Chifundo Masapula, wati timu yake ilimbikira masewero awo omwe atsala nawo kuti mwina angathe kutsala mu ligi ya TNM.

Iye amayankhula atatha masewero omwe agonjetsa Ekwendeni Hammers 1-0 ndi chigoli cha Humphreys Minandi ndipo wati ananena kale kuti ligi siyinathe.

"Tithokoze osewera athu kamba kosewera mwapamwamba, tithokozenso Mulungu kamba ka chipambanochi, ndinkanena kuti ligi siyinathe nde apapa tangotsala ndi masewero awiri nde tiwakonzekere bwino kuti tichite bwino." Anatero Masapula.

Patsogolo pa masewero awo ndi FCB Nyasa Big Bullets, iye wati awakonzekera masewerowa poti kutola mapointsi mmasewerowa kudzawachitira ubwino waukulu. Iwo adakali pa nambala 15 ndi mapointsi 28 pamasewero 28 amu ligiyi.

Wolemba: Hastings Wadza Kasonga Jr

"TIZIBWANA PANG'ONO TATIPWETEKETSA" - MAULUKA

Wachiwiri kwa mphunzitsi watimu ya Ekwendeni Hammers, Luckson Mauluka Nyoni, wati timu yake inangochita zibwana pang'ono zomwe zachititsa kuti agonje pomwe amasewera ndi Red Lions.

Iye amayankhula atatha masewero omwe agonja 1-0 pa bwalo la Balaka ndipo wati timu yake inali bwino mchigawo choyamba koma Lions inasintha zinthu mu chigawo chachiwiri.

"Anali masewero a zigawo ziwiri, mu chigawo choyamba tinasewera bwino moti tinapeza mipata yochuluka yoti tikanatha kugoletsa koma chigawo chachiwiri Red Lions inabwera, analowetsa winawake kumbaliku yemwe anasinthadi zinthu, ndi tizibwana tinachinyitsa." Anatero Mauluka.

Timu ya Ekwendeni Hammers tsopano ili nawo pa ngozi yoti itha kutuluka mu ligi ya TNM pomwe ili ndi mapointsi 30 pa masewero 27 ndipo ali pa nambala 13 mu ligiyi.

Wolemba: Hastings Wadza Kasonga Jr

"IKANAKHALA LIGI YATHA SIBWENZI TIKUMENYA MASEWERO" - M'GANGIRA

Wachiwiri kwa mphunzitsi watimu ya Silver Strikers, Peter M'gangira, wati timu yake ikuyang'anabe mwachidwi masewero awo omwe akusewera ndipo wati ligi siyinathe.

Iye amayankhula atatha masewero omwe timuyi yagonjetsa timu ya Chitipa United 1-0 pa bwalo la Karonga ndipo wati ndi okondwa kamba koti akhala timu yoyamba kugonjetsa Chitipa pa kwawo.

"Ndife okondwa kamba koti tapambana, awa ndi masewero oyamba kugonja panopa koma tasewera bwino, tinapeza mipata yochuluka komabe tapeza chigoli cha changu. Chilichonse chikhonza kuchitika, ikanakhala kuti ligi yatha sibwenzi tikusewerabe masewero." M'gangira anafotokoza.

Timu ya Silver Strikers tsopano ili ndi mapointsi okwana 50 pa masewero 27 omwe yasewera ndipo ili pa nambala yachitatu mu ligiyi.

Wolemba: Hastings Wadza Kasonga Jr

"AKUYENDETSA MPIRAWA ANGONENA CHOMWE AKUFUNA" - NGINDE

Mphunzitsi watimu ya Chitipa United, MacDonald Mtetemera, wati ndi wokhumudwa kamba ka omwe amapanga masewero akuchitira pomwe ayipanikiza timuyi ndi masewero ambiri ngakhale kuti kutsogoloku kuli mpata wambiri.

Iye amayankhula atatha masewero omwe agonja 1-0 ndi timu ya Silver Strikers pakwawo ndipo wati omwe amapanga masewerowa angonena chimene akufuna.

"Anyamata anga asewera bwino koma zomwe tikunena kuti mtima ukufuna koma mtima ukukana, tinapita ku Blantyre anati tipite ku Lilongwe kokamenya ndi Civo kenaka tikubwera kuno ati tikhote kaye ku Rumphi apa akuti tibwererenso ku Rumphi kokumana ndi Moyale, anthuwa ndi matupi amafuna kupuma." Anatero Mtetemera.

Iye wati ndi wokondwa poti khumbo lawo la chaka chino layenda ndipo ali pa nambala yachinayi ndi mapointsi 44 pa masewero 27 mu ligi.

Wolemba: Hastings Wadza Kasonga Jr

Bullets 8_0lipumundu