CHAWINGA APHONYANA NDI ARSENAL

Katswiri wa timu ya Scorchers, Tabitha Chawinga, sapezeka pa masewero omwe OL Lyoness ikumane ndi timu ya Arsenal Women podzigulira malo mu ndime yotsiriza ya chikho cha UEFA Women's Champions League loweruka.

Chawinga sali mu gulu la osewera omwe agwire ntchito mu masewerowa kamba kovulala malingana ndi ndandanda womwe timuyi yatulutsa.

Katswiriyu anali panja pa masewero oyamba omwe matimuwa anakumana Ku dziko la England lamulungu lapitalo ndipo sanalowetsedwe mu masewero onse.

Timu ya Lyon ikulowa mmasewerowa ikugonja 2-1 ndipo ikuyang'ana zobwenza chipongwe kamba koti inatulutsidwanso mu ndime ya matimu anayi ndi Arsenal yomweyi chaka chatha.

"TIYESETSA KUTI TIPAMBANE PAKHOMO" - MGANGIRA

Mphunzitsi watimu ya Silver Strikers, Peter Mgangira, wati timu yake ikukumana ndi timu yovuta kwambiri komabe ayesetsa kuti achite bwino pogwiritsa ntchito mwayi wosewerera pakhomo.

Iye amayankhula patsogolo pa masewero omwe akukumana ndi Moyale Barracks pa bwalo la Silver loweruka.

Iye wati timu yake yakonzekera bwino masewerowa ndipo akudziwa momwe akachitire poti akakumana ndi matimu achisilikali samafuna kuti timu yake izisunga mpira kwambiri.

"Tikukumana ndi timu yovuta yomwe ndi amkhala kale mu ligi komanso ili ndi aphunzitsi odziwa ntchito komabe kwa ife takonzekera kuti mwina tidzaonetse mwayi wosewerera pakhomo," anatero Mgangira.

Iye watinso ochemerera a timuyi akhamukire ku bwaloli kudzasapotera timuyi ndipo adzayesetsa kuti adzawapatse chimwemwe pakutha pa masewerowa.

Silver ili pamwamba pa ligi ndi mapointsi atatu kamba koti inapambana 2-0 ndi Kamuzu Barracks mu masewero oyamba.

Katswiri wa timu ya Scorchers, Tabitha Chawinga, wasankhidwa mu gulu la osewera asanu omwe alimbirane mphoto ya osewera wapamwamba mu ligi ya mdziko la France ya chaka chino.

"KUPAMBANA KUTITHANDIZA KUTI TIKHAZIKIKE KWAMBIRI" - MPONDA

Mphunzitsi watimu ya Masters Football Club, Peter Mponda, wati timu yake ikukumana ndi timu yovuta kwambiri ikakhala pa kwawo koma kupambana kuwathandizire kukhazikika mu ligi.

Iye amayankhula patsogolo pa masewero awo ndi Karonga United ku Karonga lamulungu ndipo wati akukhulupilira kuti akonzekera bwino.

Mponda wati sangawerengere kuti anapambana mu masewero okonzekera ligi poti matimu ambiri samayang'ana zopambana mu masewero oterewa.

"Ifeyo takonzekera bwino ndipo ndili ndi chikhulupiliro kuti tikachita bwino koma Karonga ndi timu yovuta yomwe ili ndi anyamata ovuta komabe tikayesetsa chifukwa tikapambana tikhala ndi chikhulupiliro kuti tizichita bwino," anatero Mponda.

Iye wati timuyi sikhala ndi Chisomo Mpachika kwa masabata awiri yemwe ndi wovulala.

Masters ili pa nambala yachitatu mu ligi pomwe ili ndi mapoints atatu pa masewero amodzI.

"NDIKUKHULUPIRA KUTI TIKACHITA BWINO" - MAKAWA

Mphunzitsi watimu ya Civil Service United, Abbas Makawa, wati akhulupilira kuti timu yake itakasewera ngati momwe anachitira mu chigawo chachiwiri ndi FCB Nyasa Big Bullets atha kukachita bwino ku Dedza.

Iye amayankhula patsogolo pa masewero awo ndi timu ya Goshen City Dedza Dynamos lamulungu pa bwalo la Dedza ndipo wati akuyembekeza kuti akakhala masewero ovuta.

Iye wati kupambana komwe anakupeza ligi isanayambe siwapangitsa kuti ayiderere Dedza koma apita ndi mtima wofuna kukachita bwino.

"Ndi Bullets mu chigawo choyamba tinali achiwiri pa mpira komanso tinaphonya kwambiri koma mchigawo chachiwiri tinali bwino mwinanso ndi chifukwa tibamwetsa zigoli ziwiri nde ngati tikasewere momwemo tikachita bwino," iye anatero.

Matimuwa anakumana mu mpikisano wa chigawo chapakati pa bwalo lomweli ndipo Civil inapambana 3-0 kuti akhale akatswiri.

Timuyi ili pa nambala 6 ndi pointi imodzi imene anayipeza atalepherana ndi Bullets 2-2.