"SINDINGALONJEZE ZAMBIRI KOMA NDAYIPHUNZIRA LIGI" - KAPALAMULA

Wosewera wotseka kumbuyo kutimu ya Chitipa United, Wetner Kapalamula, wati akuyembekeza kuti ligi ya chaka chino achita bwino kwambiri kutengera kuti tsopano waphunzira mmene mpira umayendera mu ligi ya TNM.

Iye amayankhula ndi Sports Torch pomwe posachedwa akhale akuyamba zokonzekera ndi Chitipa ndipo wathokoza anthu onse omwe amamutsatira.

"Anthu omwe amanditsatira apitilize kundipatsa sapoti makamaka anthu ochokera ku Mbayani, Mulungu apitilize kuwadalitsa ndipo azingondipemphelera kuti chaka chino awone zapamwamba kuchokera kwa ineyo." Anatero Kapalamula.

Iye wati mu chaka chake choyamba mu ligiyi waphunzira zambiri zomwe zimuthandizire kuchita bwino mu 2024.

"Sindingalonjeze zambiri koma ndi Ambuye tiwonetsa zapamwamba chifukwa ligiyi tsopano ndayidziwa ndipo ndiyesetsa kulimbira kuti tithandize timu ija kuchita bwino kuposa pomwe tili." Anawonjezera Kapalamula.

Katswiriyu anaphunzira mpira wake kutimu ya Griffin

BINWELL KATINJI WAYAKA MOTO KU ZAMBIA

Katswiri waku Malawi, Binwell Katinji, akuchita bwino mdziko la Zambia komwe akuyesa mwayi pomwe wamwetsa zigoli zisanu ndi ziwiri (7) pa masewero atatu omwe wasewera ndi timu ya Mufulira Wanderers.

Katswiriyu anapita kutimuyi komwe akukayesa mwayi pomwe timuyi inaonetsa chidwi chofuna kumutenga itatha ligi ya TNM mmwezi wa December.

Iye alibe mgwirizano uliwonse ndi timu iliyonse pomwe mgwirizano wake ndi Civo unatha pa 31 December 2023.

Mu ligi ya chaka chatha, iye anagoletsa zigoli 12 za Civo pomwe anali wachinayi pa anthu omwetsa zigoli zambiri ndipo yemwe anagoletsa zigoli zambiri, Clement Nyondo, anamwetsa zigoli 16.

Wolemba: Hastings Wadza Kasonga Jr

BULLETS NDI WANDERERS AKUMANA PA 04 MARCH

Matimu a FCB Nyasa Big Bullets komanso Mighty Mukuru Wanderers akuyembekezeka kukumana koyamba chaka chino pa 4 March 2024 pamwambo omwe osewera akale amatimuwa akufuna kutolera ndalama zothandizira bungwe la osewera akalewa.

Izi zadziwika ku Lali Lubani kunyumba ya Wanderers komwe bungwe la osewera akale amatimuwa lakhazikitsidwa ndipo asankha Kelvin Moyo kukhala mtsogoleri wa bungweli.

Moyo wati iwo alingalira zokhazikitsa bungweli kamba ka imfa ya osewera wakale wa Wanderers, Jack Chamangwana, ndipo sakufunanso kuti osewerawa azivutika.

Masewero pakati pa matimuwa ndi ofuna kupeza ndalama ya bungweli ndipo Yasin Osman adzaphunzitsa Wanderers pomwe Kinnah Phiri adzatsogolera FCB Nyasa Big Bullets.

NKHANI

Katswiri wotseka pagolo kutimu ya Moyale Barracks, Macdonald Harawa, walengezanso kuti wasiya kusewera mpira.

Timu ya Moyale yalengeza kuti iye akhala mmodzi mwa aphunzitsi atimuyi ngati ophunzitsa otchinga pagolo.

NKHANI

Katswiri womwetsa zigoli kutimu ya Moyale Barracks, Gastin Simkonda, walengeza kuti tsopano wasiya mpira pomwe wasewera kwa zaka zingapo.

Timu ya katswiriyu, Moyale Barracks ndi yomwe yatsimikiza za nkhaniyi.