2026

"Sitinapange chiganizo cha chitsogolo chathu" - Sobhuza

Kampani ya TNM yati ikhala pansi ndi kuunikira chitsogolo chawo Komanso mapempho onse omwe abwera ku nkhani ya kuthandiza nkhani za masewero pakuti zinthu zinachitika modzidzimuka kwambiri pomwe anachalira kuthandizabe Supa ligi.

Mkulu woona za malonda ku kampaniyi a Sobhuza Ngwenya anayankhula izi pa mwambo wopereka mphoto kwa omwe anachita bwino mu 2025 ndipo iwo anati anasunga lonjezo posafuna kuchoka mwa chipongwe.

Iwo ati mapempho omwe boma, Football Association of Malawi ndi anthu ena opitilizabe kuthandiza ku mpira awamva koma sangapange chiganizo asanaunikire chitsogolo chawo.

"Tinali okonzeka kuthandizanso mu chaka cha 2026 koma zinthu zake zinachitika mwa changu nde panopa kuti ndifotokozere chitsogolo chathu ndekuti ndidya mfulumira, tikakhale psnsi kaye tidzanena," anatero Ngwenya.

Kampaniyi yakhala ikuthandiza ligiyi kwa zaka 18 kuchokera mu 2006 koma pano SULOM yapeza FDH Bank ngati wowathandiza watsopano.

SULOM ipitilira kugwirabe ndi TNM

Bungwe la Super League of Malawi lati pali zinthu zochuluka zimene sizingachokeretu kuchokera ku kampani ya TNM zomwe zichititsebe kuti mbali ziwirizi zizigwirirabe ntchito limodzi.

Mtsogoleri wa bungweli Brigadier Gilbert Mitawa ati palibe chilichonse chomwe chidzafufute mbiri ya TNM pakuti yathandiza kutukula mpira wa mdziko muno.

Iye wati TNM inafika mu nthawi yomwe mpira unali wotsika kwambiri koma tsopano wakwera kwambiri kamba ka thandizo lawo mu zaka 18 zadutsazi.

"Ndi oti ali ndi zambiri chitsanzo kadi la mpata lomwe linali ndi mphamvu kugula tikiti pa makina a intaneti ndekuti zikhala zikufunikirabe nde tikhala nawo pansi kuunguza ndi iwo momwe tingapitilizire kugwiritsa nawo zinthuzi," anatero Mitawa.

Bungweli padakali pano linapeza FDH Bank ngati wothandiza ligiyi kwa zaka zisanu zikubwera kutsogoloko poonjezera kawiri ndalama zomwe TNM inkayika.

"Tiyesa kukamba nawo a TNM" - Gangata

Nduna ya zamasewero mdziko muno, Alfred Gangata, ayamikira kampani ya TNM pothandiza ligi yaikulu mdziko muno ponena kuti athandiza kutukula mpira wamiyendo mdziko muno.

Iwo amayankhula lachinayi pa mwambo omwe kampaniyi imapereka mphoto kwa osewera, olemba nkhani, oyimbira ndi matimu omwe achita bwino mu ligi ya chaka cha 2025.

TNM tsopano sizithandizanso ligiyi kutsatira kuti SULOM inapeza FDH Bank ngati othandiza atsopano ndipo Gangata wati ayesa kukamba nawo kuti asachokeretu ku maseweroku.

"Tiwathokoze poti athandizs kutukula masewero ampira. Tiyesa kukamba nawo ngati angathandizebe zinthu zina," iye anatero.

TNM inayamba kuthandiza masewero a mpira mu chaka cha 2006 ndipo akhala kwa zaka 18.

Khungwa, Salima, Babatunde ndi Wanderers alandira mphoto lero

Kampani ya lamya za mmanja ya TNM ikuyembekezeka kupereka mphoto kwa Mighty Wanderers komanso osewera monga Dalitso Khungwa, Chikumbutso Salima, Babatunde Adepoju ndi ena kamba kochita bwino mu chaka cha 2025.

Kampaniyi yakonza mwambo wopereka mphotozi madzulo a lero pa 05 February 2026 ku hotela ya Mount Soche ku Blantyre.

Iwo ati mwambowu ndi mbali imodzi yokondwerera zaka 19 zomwe akhala akuthandiza ligi yaikulu ya dziko lino kuchokera mu 2006.

Pa mwambowu, katswiri wosewera bwibo kuposa onse, omwetsa zigoli zochuluka, wotchinga kumbuyo wabwino, wapakati, mphunzitsi wabwino, oyimbira ndi akatswiri a ligi akapatsidwa mphoto.

Ndipo atolankhaninso nawo akapatsidwa ulemu pa ntchito yomwe agwira mu chakachi.