"TIKUPITA KU MCHINJI KUKATENGA MAPOINTSI" - MPONDA

Mphunzitsi watimu ya Silver Strikers, Peter Mponda, wati akupita ku Mchinji kukakumana ndi timu yabwino kwambiri yomwenso ikuchita bwino kwambiri mu ligi koma akufunitsitsa kuti akapambane mmasewero awo.

Iye amayankhula patsogolo pa masewero awo ndi timu ya Creck Sporting Club pa bwalo la Aubrey Dimba ku Mchinji loweruka ndipo wati sakufuna zambiri koma kukatengako chipambano nkumabwera.

"Akhala masewero ovuta kwambiri poti tikukumana ndi timu yabwino kwambiri yomwe ikuchita bwino mu ligi ukaona nambala yomwe ali sikuti ndi poyipa kwambiri ndipo sikuti ndi yogwera koma tikupita ku Mchinji kuti tikatenge ma points atatu." Anatero Mponda.

Iye wati timu yake ikuchokera kopambana ndi timu ya Blue Eagles mu Castel Challenge Cup ndipo zimenezi ziwapatsa mphamvu kuti akayesetse kuti akapambane mmasewerowa.

Silver ikadali pa nambala yoyamba mu ligi pomwe ili ndi mapointsi okwana 49 pa masewero 21 omwe yasewera mu ligi.