Timu ya mpira wamiyendo yachisodzera ya mdziko muno ikhale ikukumana ndi dziko la Lesotho mu mpikisano wa COSAFA.

Masewerowa ayamba nthawi ya 15:00hrs pa bwalo la ABB 2 ku Mozambique ndipo Malawi ili ndi mapointsi okwana atatu pa masewero awiri omwe yasewera poti inagonja 5-0 ndi South Africa ndi kugonjetsa Comoros 2-1.

Mphunzitsi watimuyi, Bob Mpinganjira wati wakonzeka kuti achite bwino pa masewerowa.

"Titapambana ndi Comoros tinakhala pansi ndi osewerawa kuti tiwalimbikitse ndipo akuoneka kuti alibwino. Tiyesetsa kuti tichite bwino kuti mwina ngati tingapambane kufika pa mapointsi okwana 6 titha kupitilira ngati ma best losers." Anatero Mpinganjira.

Matimu a Zimbabwe ndi Angola azigulira kale malo mu ndime ya matimu anayi a mpikisanowu pomwe South Africa mwanjira iliyonse imalizanso pamwamba pa gulu C ndipo ifika mu ndime yomweyi koma Botswana ilinso ndi mwayi poti ili ndi mapointsi asanu.