"TIKUYANG'ANA KUTHERA MU MATIMU ANAYI AKUMTUNDA" - CHIDATI

Wachiwiri kwa mphunzitsi watimu ya Civil Service United, Wilson Chidati, wati timu yake tsopano yagwirana kwambiri ndipo ikuyang'ana zoti ithere mu matimu anayi oyambilira mu ligi ya TNM chaka chino.

Iye amayankhula atatha masewero omwe alepherana 0-0 ndi timu ya Silver Strikers lamulungu masana ndipo wati timu yake yakhutira ndi zotsatirazi malingana ndi mmene masewero anachitira.

Kutsatira kufanana mphamvu ndi FCB Nyasa Big Bullets komanso Silver, Chidati wati tsopano timuyi ilibwino kwambiri.

"Sitikuyang'ananso mu matimu asanu ndi atatu oyambilira ayi koma matimu anayi chifukwa mmene timuyi ikusewera zikupereka chilimbikitso chachikulu kuti zimenezi ndi zotheka." Anatero Chidati.

Timuyi yatsika kufika pa nambala yachisanu ndi chimodzi (6) pomwe ili pa mapointsi 35 pa masewero 23 omwe yasewera mu ligi ya TNM mu chaka chino.