"TIKAWINA TIYANDIKIRA KUTENGA LIGI" - MPONDA

Mphunzitsi watimu ya Silver Strikers, Peter Mponda, wati kupambana pa masewero atimu yake ndi Civil Service United kuthandiza kuti timuyi iyandikire ukatswiri wa chikho cha TNM Supa ligi.

Iye amayankhula patsogolo pa masewero awo pa bwalo la Silver mu mzinda wa Lilongwe ndipo wati akuyembekeza masewero ovuta kwambiri komabe chipambano ndi chomwe akufuna.

"Akhala masewero ovuta kwambiri komabe masewero akakula choti zimakhala zophweka kuwalimbikitsa osewera chifukwa amakhala kuti akudziwa choyenera kuchita nde tikapambana zitipangitsa kuyandikira kutenga ligi." Anatero Mponda.

Timuyi itsegula mpata wa mapointsi asanu ndi anayi (9) pamwamba pa Mighty Mukuru Wanderers ngati ipeze chipambano pa bwalo la Silver.

Iwo ali ndi mapointsi okwana 50 pa masewero 22 omwe yasewera kale mu ligi ndipo ikadali pa nambala yoyamba.