"BULLETS SINGATIONONGERE MBIRI YA PAKHOMO PATHU" - MPONDA

Mphunzitsi watimu ya Silver Strikers, Peter Mponda, wati timu yake ikubwera pakhomo pawo pomwe sanagonjepo my ligi ndipo akukhulupilira kuti FCB Nyasa Big Bullets siwaonongera pakhomopa.

Iye amayankhula patsogolo pa masewero awo ndi FCB Nyasa Big Bullets pa bwalo la Silver loweruka masana ndipo wati timu yake yakonzeka bwino kuti apambane masewerowa poti akatero mwayi wawo wotenga ligi ukhala wachuluka.

"Akhala masewero ovuta kwambiri koma tikusewera pakhomo pomwe sitinagonjepo mu ligi, tangofananitsa mphamvu kawiri ena onse tatolera mapointsi sindikukhulupilira kuti Bullets itha kuononga mbiri yathu." Anatero Mponda.

Iye wati akatolera ma points atatu amenewa akhala kuti ligi tsopano ayandikira kutenga ndipo mapointsi atatu akubwerawa awatola ndithu.

Timuyi ili pa nambala yoyamba mu ligi pomwe ili ndi mapointsi okwana 57 pa masewero 25 omwe yasewera.