"TILEMBA MBIRI YATSOPANO YOMWE ANTHU ATADABWE" - KAMANGA

Mphunzitsi watimu ya Kamuzu Barracks, Charles Kamanga, wati anyamata ake akonzeka kwambiri kuti apange mbiri yomwe sinachitikepo pomwe akufuna afike mu ndime yotsiriza ya Airtel Top koyamba lamulungu.

Iye amayankhula patsogolo pa masewero awo ndi timu ya FCB Nyasa Big Bullets mu ndime ya matimu anayi a mpikisanowu ndipo wati timu yake yakonzeka bwino mmasewerowa.

"Takonzekera bwino kwambiri kuti mwina tichite bwino pa masewero amenewa tikudziwa kuti akhala masewero ovuta poti tikusewera ndi timu yabwino koma ndime ngati iyiyi ndi yomwe timayesetsa kuti tichite bwino nde anyamata akonzeka." Anatero Kamanga.

Iye wati katswiri wawo womwetsa zigoli kutimuyi, Zeliat Nkhoma sapezeka mmasewerowa kamba kovulala koma onse alibwino kutimuyi.

Timu yomwe ipambane pa masewerowa idzakumana ndi timu ya Silver Strikers mu ndime yotsiriza ya mpikisanowu yomwe yagonjetsa Mighty Mukuru Wanderers loweruka.