"PADAKALI PANO KULEPHERANA SIKUKUFUNIKIRA" - NYAMBOSE

Mphunzitsi watimu ya Chitipa United, Christopher Nyambose, watsimikizabe kuti timu yake sikutuluka mu ligi koma wapepesa kwa ochemerera atimuyi kuti asapse mtima ngakhale kuti zinthu sizikuyenda padakali panopa.

Iye amayankhula atatha masewero omwe anagoletsetsa chigoli pa mphindi 95 kuti akanike kugonjetsa Premier Bet Dedza Dynamos mmasewero omwe athera 2-2 ndipo wati mmene zililimu, zikufunika kuti azipambana.

"Tiwayamikire kuti anyamata asewera bwino zinangovuta ndi nzeru kumapetoku komabe tinali pakhomo timayenera kupambana chifukwa panopa ligi yavuta tikufunikira kuti tizipambana osati kufanana mphamvu poti ligi yavuta iyi." Anatero Nyambose.

Iye anati pa masewero asanu ndi awiri omwe atsala nawo mu ligi, ayesetsa kukonza zinthu kuti mwina ayembirenso kuchita bwino ndi kusatuluka mu ligi.

Timuyi tsopano yafika pa nambala 14 mu ligi pomwe ili ndi mapointsi 19 pa masewero 23 omwe yasewera mu ligi ya TNM.