"TINAKANIKA KUGWIRITSA NTCHITO MIPATA YATHU" - MZUNGA

Mphunzitsi watimu ya MAFCO, Jimmy Mzunga, wayamikira osewera ake kuti anasewera bwino kwambiri mmasewero awo koma zangovuta kuti sanagwiritse ntchito mipata yomwe anapeza.

Iye amayankhula atatha masewero omwe afanana mphamvu 0-0 pa bwalo la Chitowe ndi timu ya Premier Bet Dedza Dynamos ndipo wati akanatha kuchita bwino ngati akanagoletsa mipata yomwe anapeza.

"Anali masewero abwino tasewera bwino kuyambira koyamba mpaka kumapeto tasunga mpira kwambiri koma mipata yomwe tinayipeza takanika kugoletsa, anyamata athu sanagwiritse ntchito mipatayi." Anatero Mzunga.

Iye wati mavuto omwe awona mmasewerowa abwerera kukakonza akabwerera ku zokonzekera zawo ndipo akufunabe mapointsi ambiri kuti athere pabwino.

Timuyi ili pa nambala yachisanu ndi chitatu (8) pomwe ili ndi mapointsi okwana 30 pa masewero 23 omwe yasewera mu ligi.