"TIZIMENYERE NKHONDO TOKHA" - KAFOTEKA

Mphunzitsi watimu ya FOMO, Elvis Kafoteka, wati timu yake ikuyenera kuonetsetsa kuti ikutolera mapointsi ochuluka pa masewero awo kuti izimenyere nkhondo posayang'ana kuti matimu ena akuchita motani.

Iye amayankhula patsogolo pa masewero awo ndi timu ya Moyale Barracks pa bwalo la Mzuzu loweruka ndipo wati aonetsetsa kuchita chilichonse kuti apeze chipambano pa masewerowa.

"Akhala masewero ovuta Moyale ndi timu yabwino kwambiri koma ifeyo tikuyenera kuikapo mtima pofuna kuona kuti mapointsi amenewa akufunikira kwambiri kwa ifeyo osati iwowa nde tikayesetsa." Anatero Kafoteka.

Iye wati timu yake ikhonza kupambana masewerowa angakhale kuti Moyale ili pa khomo ndipo ati sakuyang'ana kuti matimu ena ayamba kuchita bwino koma kuti azimenyere nkhondo.

FOMO FC ili pa nambala yachikhumi ndi chitatu (13) pomwe ili ndi mapointsi 22 pa masewero 22 omwe yasewera mu ligi.