"POINT ITITHANDIZA PA ULENDO OKATENGA LIGI" - MPONDA

Mphunzitsi watimu ya Silver Strikers, Peter Mponda, wati timu yake inakonzekera kuti akapeze chipambano ku Karonga komabe kutenga point imodzi koyenda iwathandizire pa ulendo okatenga ligi.

Iye amayankhula atatha masewero omwe afanana mphamvu 1-1 ndi timu ya Chitipa United pa bwalo la Karonga masana a lachinayi ndipo wayamikira anyamata ake polimbikira kuti asagonje.

"Anali masewero ovuta kwambiri, anyamata anabwera kuti mwina tipeze chipambano koma zakanika tapeza point imodzi koyenda yomwe itithandizire pa ulendo wokatenga ligi nde tiyamike anyamata athu analimbikira kwambiri." Anatero Mponda.

Iye anakana kuti timu yake sinasewere bwino ponena kuti mwina anthu akuyenkhulira poti anayizolowera kuti ikumangowina ndipo wati anyamata ake akuyesetsa kuti asagonjeko mmasewero awo.

Timuyi ili pa nambala yoyamba ndi mapointsi 44 pa masewero 17 omwe yasewera mu ligi ya TNM.