"TIKUYENERA KUTI TIONE CHITSOGOLO" - MWANSA

Mphunzitsi watimu ya Moyale Barracks, Prichard Mwansa, wati timu yawo ikungoyenera kuvomereza kuti agonja ndipo ayang'ane chitsogolo kuti akonze mavuto omwe akumana nawo.

Iye amayankhula atatha masewero omwe agonja 2-1 ndi timu ya FOMO FC pa bwalo la Mulanje Park ndipo wati mpira unawavuta zomwe zachititsa kuti agonje mmasewerowa.

"Tagonja tivomereze zinthu zinativuta mmasewerowa nde tikungoyenera kuti tibwerere tikakonze mavuto athu kuti chitsogolo tiyende bwino nde tivomereze zativuta lero." Anafotokoza Mwansa.

Iye anati akudziwa kuti akhumudwitsa otsatira awo koma akungoyenera kuti adekhe bwinobwino poti iwo akuyang'ana chitsogolo kuti zinthu ziziyenda bwino ndipo azipambana mmasewero awo.

Timu ya Moyale ili pa nambala yachisanu ndi chitatu (8) pomwe tsopano ili ndi mapointsi 14 pa masewero khumi ndi amodzi (11) omwe asewera.