"TINAWATSEKERA MOMWE AMADUTSAMO" - CHIMKWITA

Wachiwiri kwa mphunzitsi watimu ya Karonga United, Crespo Chimkwita, wati ndi wokondwa kuti timu yake yapeza chipambano pamwamba pa timu ya Mighty Mukuru Wanderers ndipo anadziwa kuti ayitsekere mmbali momwe anzawowa amadutsa.

Iye amayankhula atatha masewero omwe apambana 1-0 pa bwalo la Karonga ndipo wati monga poti amasewera pakhomo iwowa amangoyenera kuti apeze chipambano.

"Ndife osangalala kwambiri ndipo chipambano chimenechi timachiyembekezera kwambiri komanso timadziwa kuti pakutha lero tifika pa nambala 7 nde tinali pakhomo pomwe abale athu onse analipo timayenera kupambana." Anatero Chimkwita.

Iye anatinso ayesetsa kuti akwanitse kumatolera mapointsi pa masewero omwe akusewera ndi cholinga choti adzathere pabwino ligiyi ikadzatha.

Timuyi ili pa nambala yachisanu ndi chiwiri (7) pomwe ili ndi mapointsi 33 pa masewero 23 omwe yasewera mu ligi chaka chino.