"SILINALI TSIKU LATHU" - MWASE

Mphunzitsi watimu ya Mighty Mukuru Wanderers, Meke Mwase, wati timu yake inayesetsa kupeza mipata yochuluka kuti mwina angathe kupeza chigoli komabe zawavuta poti tsiku silinali lawo basi.

Iye amayankhula atatha masewero omwe agonja 1-0 ndi timu ya Karonga United pa bwalo la Karonga ndipo wati chigoli chomwe chinabwera mofulumira kwambiri ndi chomwe chinawasokonezanso.

"Tagonja tivomereze mutha kuona kuti tinachinyitsa mwansanga kwambiri koma tinayesetsa kuti mwina tingathe kubwenza tiwathokoze anyamata kuti asewera bwino koma silinali tsiku lathu basi." Anatero Mwase.

Iye wati timu yake siyitopa pomwe masewero asanu ndi atatu atsalawa ayesetsa kuti achite bwino poti mu mpira chilichonse chikhonza kuchitika.

Timu ya Mighty Mukuru Wanderers ili pa nambala yachiwiri mu ligi pomwe ili ndi mapointsi okwana 44 pa masewero 22 omwe asewera pomwe akusiyana mapointsi asanu ndi imodzi ndi Silver Strikers.