"TAKHALITSA OSAWINA NDE TIYESETSA" - KAMANGA

Mphunzitsi watimu ya Kamuzu Barracks, Charles Kamanga, wati timu yake yakhalitsa osapeza chipambano ndipo akuyenera kuchilimika kuti achite bwino tsopano.

Iye amayankhula patsogolo pa masewero awo ndi timu ya Karonga United pa bwalo la Rumphi lachitatu masana ndipo wati akudziwa kuti akhale masewero ovuta koma akhala masewero asanu ndi awiri osapambana nde achilimika.

"Akhala masewero ovuta poti Karonga ndi timu yabwino ya ana achisodzera komanso ikusewera mpira wabwino koma ifeyo takhalitsa osawina, tasewera masewero 7 opanda kuwina nde tiyesetsa kuti tichite bwino ngakhale sizikhala zophweka." Anatero Kamanga.

Ndipo iye wati timuyi tsopano ili bwino pomwe yapeza ma goloboyi awiri, wotseka kumbuyo mmodzi ndi wosewera mmbali kuti athandizire kulimbitsa timuyi.

KB ili pa nambala yachisanu ndi chiwiri (7) pomwe ili ndi mapointsi okwana 24 pa masewero 16 omwe yasewera mu ligi.