"TAKONZA KUTI TIKAPAMBANE NDITHU" - IKWANGA

Mphunzitsi watimu ya Mzuzu City Hammers, Kondwa Ikwanga, wati akudziwa kuti akuchoka kogonja mochititsa manyazi ndi timu ya Mighty Mukuru Wanderers 8-0 koma akonza mavuto awo kuti achite bwino.

Iye amayankhula patsogolo pa masewero awo ndi timu ya FOMO FC omwe aseweredwe pa bwalo la Mzuzu loweruka ndipo wati timu yake yakonza kuti ikachite bwino.

"Tikuchoka kogonja, osatinso kugonja chabe Kona mochititsa manyazi moti anthu amaona kuti palibe chanzeru tikupanga koma titaunguza mavuto takonza ndipo chimene tikuyang'ana ndi chipambano koma zitengera kulimbikira kwa osewera." Anatero Ikwanga.

Iye wathokoza mabwana a timuyi pomulora kuti akonze mavuto awo omwe alipo ndikuwaphunzitsa osewera awo mopanda phuma kusatengera kusachita bwino kwa timuyi.

Hammers sinagonjeko pakhomo pawo chaka chino ndipo ili pa nambala yachinayi ndi mapointsi 25 pa masewero 16 omwe yasewera.