"TIKHONZA KUSIMBA LOKOMA NDI CRECK" - KAMANGA

Mphunzitsi watimu ya Kamuzu Barracks, Charles Kamanga, wati akuyembekezera kuti timu yake ichita bwino pomwe wakhutira ndi mmene anyamata ake achitira pa zokonzekera zawo.

Iye amayankhula patsogolo pa masewero omwe asewere ndi Creck Sporting Club pa bwalo la Aubrey Dimba ku Mchinji ndipo wati timu yake yakhala osapambana pa masewero anayi nde ikuyenera kutero.

"Takonzekera bwino kwambiri komanso anyamata amaoneka kuti anali bwino ku zokonzekera zathu nde tikuyembekeza kusimba lokoma pa Dimba pomwe tikukasewera ndi Creck," anatero Kamanga.

Timuyi ili ndi mwayi wofanana mapointsi ndi Mighty Mukuru Wanderers mu ligi ngati angapambane chifukwa akhala ndi mapointsi 25.

Timuyi padakali panopa ili ndi mapointsi okwana 22 pa masewero 13 omwe yasewera pomwe yapambana kasanu, kufanana mphamvu kasanu ndi kawiri ndikugonja kamodzi.