OSEWERA ATATU SAPEZEKA NDI TIGERS

Timu ya Mighty Mukuru Wanderers sikhala ndi osewera ake atatu, Felix Zulu, Mphatso Kamanga komanso Robin Ngalande kamba koti ali ndi makalata achikasu atatu komanso kuvulala.

Wachiwiri kwa mphunzitsi watimuyi, Albert Mpinganjira, watsimikiza za kusapezeka kwa osewerawa pomwe wati Zulu ndi Kamanga ali ndi makadi achikasu atatu pomwe Ngalande ndi wovulala.

Iye wati masewero awo ndi Tigers ndi ofunikira kwambiri ndipo akuyenera kupambana kuti mwayi wotenga ligi usawatayike.

"Tigers timavutitsana nawo kwambiri komabe anyamata athu tawauza ndipo akudziwa kufunikira kopambana mmasewero amenewa." Anatero Mpinganjira.

Atakumana mu chigawo choyamba, matimuwa analepherana 1-1 pa bwalo la Mpira. Wanderers ili pa nambala yachiwiri ndi mapointsi 54 pa masewero 28 omwe asewera.

Wolemba: Hastings Wadza Kasonga Jr