"APA ANYAMATA APUMA TIBWERA NDI MOTO" - MUNTHALI

Wachiwiri kwa mphunzitsi watimu ya FCB Nyasa Big Bullets, Heston Munthali, wati timu yake ipita mmasewero ake ndi Dedza Dynamos mwamphamvu pomwe wati tsopano osewera ake apumako.

Iye amayankhula izi patsogolo pa masewero awo ndi Dedza Dynamos pa bwalo la Dedza lachinayi ndipo wati akuyembekeza kuti timu yake ichita bwino poti anyamata ena abwereranso.

"Tikubwereranso pa bwalo titapuma kwa masiku angapo, zatithandiza kuti osewera athu apume nde tibwera mwa mphamvu komanso osewera ena monga Senaji, Collins [Okumu] komanso Ernest Petro abwereranso nde zitipatsa mphamvu zina." Anatero Munthali.

Iye wati akuyembekeza kuti masewerowa akhale ovuta potengera kuti Dedza ikadzuka bwino imavuta kwambiri. Mu chigawo choyamba, matimuwa analepherana 2-2 ndipo Bullets ili pa nambala yoyamba ndi mapointsi 56 pa masewero 27.

Wolemba: Hastings Wadza Kasonga Jr