"PANOPA NDIFE AGALU OLUSA" - BUNYA

Mphunzitsi watimu ya Premier Bet Dedza Dynamos, Andrew Bunya, wati akuyembekezera kuti akhale ndi masewero ovuta kwambiri pomwe akukumana ndi timu ya Chitipa United koma wati timu yake ndi yolusa pofuna kupeza mapointsi awo oyamba koyenda.

Iye amayankhula patsogolo pa masewero awo ndi timu ya Chitipa United pa bwalo la Karonga loweruka masana ndipo wati anyamata ake akonzeka kuti mwina achite bwino.

"Takonzekera bwino kwambiri anyamata awuzidwa kufunikira koti tikachite bwino ndipo takhala opanda chipambano mmasewero athu koyenda nde ndikukhulupilira kuti koyamba kakhala mmasewero awawa." Anatero Bunya.

Iye wati ndi wokondwa ndi kubwerera kwa osewera ena mu timu yake ndipo zithandizira kusokerera mu malo ena momwe mumavutikira ndithu.

Timuyi ili pa nambala 11 mu ligi pomwe ili mapointsi 28 pa masewero 23 omwe yasewera mu ligi ya TNM.