"LERO CHILICHONSE CHATIVUTA BASI" - BUNYA

Mphunzitsi watimu ya Premier Bet Dedza Dynamos, Andrew Bunya, wati timu yake yakanika kupanga chilichonse pomwe mpira wawavuta kwambiri kupangitsa kuti agonje koyamba pakhomo mu ligi ya chaka chino.

Iye amayankhula atatha masewero omwe agonja 0-1 ndi timu ya Civil Service United pa bwalo la Dedza ndipo wati anyamata ake sanadzuke bwino pa masewero amenewa.

"Anali masewero ovuta kwambiri kutengera kuti chilichonse chomwe tinakonza sichimatheka, kuyesera kupita kutsogolo kumavuta, kupatsirana, kumenyera pagolo ndi kena kalikonse kamakanika nde titha kunena kuti anyamata sanadzuke bwino nde anzathuwa anakwanitsa kupeza chigoli nde ndi zotsatira zoipa kwambiri." Anatero Bunya.

Timuyi ili tsopano pa nambala yachikhumi ndi chimodzi (11) mu ligi pomwe ili ndi mapointsi 24 pa masewero 20 omwe yasewera.