KB YAFIKA PA NAMBALA YACHITATU

Nkhonya yobwenzera yawawa pomwe timu ya Kamuzu Barracks yakwanitsa kugonjetsa timu ya Chitipa United 2-0 pa masewero omwe anaseweredwa pa bwalo la Nankhaka kuti ibwenzere chipongwe chomwe yakhala ikulandira.

Timuyi inagonja 4-1 mchigawo choyamba ndipo inabandulidwanso 2-0 mu chikho cha Airtel Top 8 lamulungu lathali koma zigoli za Samuel Chiponda ndi Gregory Nachipo zathandizira kutengera timuyi pa nambala yachitatu mu ligi.

Mphunzitsi wamkulu, Charles Kamanga, wati ndi wokondwa kamba Ka chipambanochi poti chikumakhala chosowa mu ligi.

"Anali masewero abwino kwambiri anyamata analimbikira kuti tipeze chipambano chifukwa Chitipa United ndi timu yabwino kwambiri koma tinayesetsa kuti tichite bwino chifukwa takhala tisakuchita bwino." Anatero Kamanga.

Iye anati chipambano chawo chakhala chofunikira chifukwa akwanitsa kusuntha mu ligi.

Timuyi ili pa nambala yachitatu mu ligi pomwe ili ndi mapointsi okwana 31 pa masewero 20 omwe yasewera mu ligi.