"TIMASEWERA NDI TIMU YABWINO" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati timu yake yakanika kuchita bwino pa masewero awo ngakhale kuti amafunitsitsa kupambana kamba koti amasewera ndi timu yabwino.

Iye amayankhula atatha masewero omwe afanana mphamvu 0-0 ndi timu ya Civil Service United pa bwalo la Civo lachitatu ndipo iye wati wavomereza zotsatirazi.

"Anali masewero abwino kwambiri ndipo tinabwera kuti tidzapeze chipambano komabe zativuta timasewera ndi timu yabwino komabe point koyenda ndi yabwinobwino tiyesetsa kuti tikonze mavuto omwe tawaona kuti mmasewero otsatira tidzachitenso bwino." Anatero Mzunga.

Timuyi tsopano yafika pa nambala yachisanu ndi chiwiri (7) pomwe ili ndi mapointsi okwana 27 pa masewero 20 omwe yasewera mu ligi.