"ANALI MASEWERO OVUTA KWAMBIRI" - IKWANGA

Mphunzitsi watimu ya Mzuzu City Hammers, Kondwa Ikwanga, wati masewero atimu yawo ndi Karonga United anali ovuta poti matimuwa anakumananso posachedwa mu FDH Bank.

Iye amayankhula atatha masewero omwe afanana mphamvu 1-1 pa bwalo la Karonga lachitatu ndipo wati anayesa kusintha timu yomwe inasewera masabata awiri apitawo komabe Karonga inakonzeka.

"Anali masewero ovuta kwambiri ndipo matimu onse anasewera bwino kungoti tinakumana pompano mu FDH ndipo anatimenya mpake ndinasintha osewera ambiri mu timuyi koma Karonga inakonzeka ifenso tinakonzeka mpake talepherana." Anatero Ikwanga.

Iye wati timu yake yayesetsabe kuthera pabwino ndipo akuyembekezera kuti mchigawo chachiwiri alimbikira kuti achitebe bwino.

Hammers yamalizira pa nambala yachitatu mchigawo choyamba pomwe ili ndi mapointsi 25 pa masewero 15 omwe yasewera.