"TIMAYENERA KUTI TIPAMBANE LERO" - KAMANGA

Mphunzitsi watimu ya Kamuzu Barracks, Charles Kamanga, wati timu yake imayenera kuti apambane masewero awo poti anapanikiza mchigawo choyamba ndi chachiwiri chomwe.

Iye amayankhula atatha masewero omwe afanana mphamvu 0-0 ndi FCB Nyasa Big Bullets ndipo wati timu yake inaphonya mipata yawo moti sikunalembedwe kuti apambane masewerowa.

"Takanika kupambana tokha, mpata unalipo pomwe tinapanikiza mchigawo choyamba komanso chachiwiri koma mwina mwayi sunali wathu kuti tipeze chipambano mmasewerowa." Anatero Kamanga.

Iye anatinso goloboyi wawo, Hastings Banda, wawathandiza kwambiri poti Bullets ikanatha kupeza zigoli zambiri komanso akufunikira kuti akonze kutsogolo kwawo.

Timu ya KB ili pa nambala yachiwiri mu ligi pomwe tsopano ali ndi mapointsi 20 pa masewero khumi ndi amodzi (11) omwe yasewera.