CASTEL YALEDZERETSA MPIRA KU MALAWI

Kampani yofulula mowa ya Castel Malawi ichititsa kuti anthu aledzere tsopano ndi masewero a mpira pomwe yaonjezera ndalama zomwe imapereka ku chikho Cha Castel ndi ndalama zokwana K80 million mu chaka cha 2024.

Mkulu woyendetsa kampaniyi, a Thomas Reynaud, ndi omwe atsimikiza zankhaniyi ku hotelo ya Amaryllis mu mzinda wa Blantyre pa mwambo wopereka mphoto kwa omwe anachita bwino chaka chatha.

Iwo ati ndalama zomwe anayika chaka chatha zokwana K320 million tsopano zifika pa K400 million ndipo opambana azilandira K55 million kuchoka pa K50 million.

Poyankhulapo, mtsogoleri wa Football Association of Malawi, Fleetwood Haiya, anathokoza kampaniyi ndipo wati chifukwa cha kuzipereka kwawo, bungwe liwathandiza kugulitsa malonda awo kudzeranso mu mpikisanowu.

Mu chaka choyamba, FCB Nyasa Big Bullets ndiyo inapambana chikhochi itagonjetsa Silver Strikers 4-2 pa mapenate.

Wolemba: Hastings Wadza Kasonga Jr