"NDEKUTI PALIBE ANGAGWETSE BULLETS" - MKWATE

Katswiri wa FCB Nyasa Big Bullets, Mike Mkwate, wati ndi wokondwa kamba koti apambana zikho zonse mdziko muno kuonetsa kuti palibe timu yomwe ingawagonjetse mdziko muno.

Iye amayankhula pomwe timu yake inagonjetsa MAFCO 2-1 kuti akhale akatswiri a chikho Cha Airtel Top 8 chomwe ndi chachinayi mu chaka chino. Iye wati kutenga zikho nde chomwe osewera amayang'ana.

"Ine ndili wokondwa kamba kotenga zikho zimenezi, kutenga chikho ili ngati mphatso kwa osewerafe. Ndi zinthu zokoma kutenga zikho zonse kusonyeza kuti ifeyo palibe angatigonjetse mmalawi muno ndipo kuti ndife nambala 1." Anatero Mkwate.

Katswiriyu watenga nawo mendulo koma asakusewera kamba koti anavulala kumayambiliro a ligi ya chaka chatha ndipo mpaka pano sanachire.

Kupatula Castel Challenge, FDH Bank, TNM Supa ligi ndi Airtel Top 8, Bullets yatenganso tizikho tina tomwe ndi NBS Charity Shield komansotu Kamuzu Cup.

Wolemba: Hastings Wadza Kasonga Jr