KARONGA SIKUFUNA KUTAYA KANTHU PAKHOMO

Mphunzitsi watimu ya Karonga United, Trevor Kajawa, wati timu yake yakonzeka bwino kuti akumane ndi timu ya Moyale Barracks lachitatu pa bwalo la Karonga ndipo wati chimene akuyang'ana ndi chipambano.

Mphunzitsiyu wayankhula izi patsogolo pa masewerowa ndipo wati wawauza anyamata ake kufunikira kopeza zipambano pakhomo.

"Anyamata akonzekera bwino ndipo tsopano chifukwa choti tili pakhomo tikuyenera kupambana ndi chipambano chitithandiza kufikabe kumtunda kwa ligiyi. Anyamata ali bwino ndipo ndi mmene akusewerera, lachitatu tichita bwino." Anafotokoza Kajawa.

Chiyitengereni timu ya Karonga, Kajawa watsogolera ku zipambano ziwiri, 4-1 ndi Ekwendeni Hammers komanso 2-1 ndi Kamuzu Barracks koyenda ndipo timuyi ili pa nambala 10 ndi mapointsi 24 pa masewero 19.

#Tawonga2023