SANTHE ADMARC ITHA KUTULUTSIDWA MU CHIPIKU

Bungwe loyendetsa mpira mchigawo chapakati la Central Region Football Association lapereka chilango ku timu ya Santhe ADMARC kamba kokanika kukasewera masewero awo ndi timu ya St Gabriel Namitete Zitha omwe analiko lachitatu.

Mu kalata yomwe wasaina ndi mlembi wamkulu wa bungweli, Antonio Manda, yati Santhe ikuyenera kupereka ndalama yokwana K500,000 kamba kokanika kupita ku masewerowa ndipo akuyenera kupereka pasanathe maola 48 omwe ndi masiku awiri.

Kalatayi yati ngati timuyi sikwanilitsa kutero, iyembekezere kulandira chilango chokhwima kuposera pamenepo chomwe chitha kufika mpaka poyitulutsa mu ligiyi.

Mmasewerowa Zitha inapatsidwa kuti yapambana masewerowa 2-0 kamba koti iwo anakwanitsa kufika pa masewerowa ndipo amaliza masewero awo pamwamba pa gulu lawo ndi mapointsi okwana 30.

Wolemba: Hastings Kasonga