"OYIMBIRA ATIKANIRA CHIGOLI CHABWINO" - BUNYA

Mphunzitsi watimu ya Premier Bet Dedza Dynamos, Andrew Bunya, wati oyimbira samayenera kuwakanira chigoli chimene iwo anagoletsa mchigawo choyamba poti chinali chabwinobwino pomwe chikanakhala chokhacho cha mmasewero omwe amasewera ndi MAFCO.

Iye amayankhula atatha masewero omwe afanana mphamvu 0-0 pa bwalo la Chitowe ndipo wati timu yake inayesetsa kuti apeze chigoli koma ndi chimene chakanidwacho.

"Anali masewero ovuta kwambiri koma sindikudziwa maso a anzathu oyimbira poti tinapeza chigoli chabwinobwino koma iwo mkuona kwawo anachikana koma anali masewero ovuta kwambiri, ofunika mphamvu komanso ndi kutentha kwa kunoko masewero anatenthadi." Anatero Bunya.

Iye wati akufunitsitsa kuti timu yake ipezeko chipambano koyenda poti akachitako bwino ndekuti afanana mphamvu koma malingana ndi pomwe ali akuyenera azipambana.

Timuyi ili pa nambala yachikhumi ndi chiwiri (12) pomwe ili ndi mapointsi 25 pa masewero 22 omwe yasewera.