"TIKANAMENYERA PA CIVO TIKANACHITA BWINO" - CHIDATI

Mphunzitsi watimu ya Civil Service United, Wilson Chidati, wati timu yake ikanatha kuchita bwino ikanakhala kuti imasewera pa bwalo la Civo ndipo kusintha komwe kunalipo kwawasokoneza kwambiri.

Iye amayankhula atatha masewero omwe agonja 1-3 ndi timu ya Creck Sporting Club pa bwalo la Champions masana a lachitatu ndipo wati anyamata ake anali obalalika kwambiri.

"Anali masewero abwino koma tsiku la lero anyamata anali wobalalika ndi zomwe zachitika angakhale ifenso tinabalalika nde tingowayamikira anzathu kuti asewera bwino." Anatero Chidati.

Timuyi inali pa mkangano ndi bungwe la Super League of Malawi pomwe iwo amafunabe kuti masewero aseweredwe pa bwalo la Civo osati ku Champions koma bungweli linakulabe mphamvu.

Timuyi tsopano yatsika pomwe ili pa nambala yachisanu ndi chiwiri (7) pomwe ikadali ndi mapointsi okwana 35 pa masewero 24 mu ligi.