MASEWERO A WANDERERS NDI SILVER AKADALI PA 25 NOVEMBER

Bungwe la Football Association of Malawi latulutsa masiku omwe masewero awiri amu chikho cha Airtel Top 8 aseweredwe komanso mabwalo ake.

Bungweli latsimikiza kuti timu ya Mighty Mukuru Wanderers ikumanabe ndi Silver Strikers loweruka likudzali pa bwalo la Kamuzu mu masewero achibwereza a mu ndime ya matimu asanu ndi atatu ngakhale kuti Wanderers yakasumabe posagwirizana ndi chiganizo cha bungweli.

Wanderers ikutsutsana ndi chiganizo choti inagonja 2-0 kamba koti inatuluka mu bwalo la zamasewero asanathe komanso kuti apereke K24.5 million kamba kophwanya mipando ya pa bwalo la Bingu.

Ndipo masewero oyamba a ndime ya matimu anayi iliko lamulungu pakati pamatimu a Blue Eagles ndi FCB Nyasa Big Bullets omwe akumane pa bwalo la Bingu lamulungu likudzali.

Opambana pakati pa Wanderers ndi Silver adzakumana ndi MAFCO komatu tsiku ndi bwalo zilengezedwabe kutsogoloku.