"POINT IMODZI SINANDISANGALATSE" - MWANSA

Mphunzitsi watimu ya Moyale Barracks, Prichard Mwansa, wati siokhutira ndi kupeza point imodzi pamwamba pa timu ya Creck Sporting Club ndipo wati iye anakonza kuti timuyi ipambane masewero ake.

Iye amayankhula atatha masewero omwe afanana mphamvu 0-0 pa bwalo la Mzuzu loweruka masana ndipo wati timu yake sinasewere bwino ngati momwe imadziwikira.

"Anali masewero ovuta kwambiri sitinasewere bwino ngati momwe timasewerera mopatsirana ndi kupita kutsogolo nde kupeza point imodzi sinandisangalatse poti tinakonza kuti tipeze chipambano pa masewerowa koma zavuta." Anatero Mwansa.

Iye wati timu yake ikhale ikukonza mavuto awo omwe awaona mmasewerowa ndipo akakonza akuyembekezera kuti azichitanso bwino mu ligi.

Moyale tsopano ili pa nambala yachisanu ndi chimodzi mu ligi pomwe ili ndi mapointsi 29 pa masewero 21 omwe iyo yasewera.