"TIKUDZIWA KUTI WANDERERS IKUFUNA KUTENGA LIGI" - MAKAWA

Mphunzitsi watimu ya Civil Service United, Abbas Makawa , wati kusewera pakhomo sikukuwapatsa mpata kuti akhonza kuwina masewero awo ndi Mighty Mukuru Wanderers mophweka koma akuyenera kulimbikira poti akhala ovuta.

Iye amayankhula patsogolo pa masewerowa omwe aliko lachisanu pa bwalo la Civo ndipo wati akudziwa kuti Wanderers ikhala yofunitsitsa chipambano koma ayesetsa kuti achite bwino.

"Akhale masewero ovuta kwambiri kutengera kuti Wanderers ikufuna itatenga ligi komanso ikufuna iziyithamangira timu ya Silver Strikers nde sabwera mophweka koma ifeyo takonzeka bwino ndipo ngati anyamata akapange zomwe tawauza ndithu tikapambana mmasewerowa." Anatero Makawa.

Iye watinso osewera onse aliko ku mbali ya timu yake ndipo akuyang'ana zongogwira ntchito kuti apambane mmasewero.

Civil ili pa nambala yachisanu ndi chiwiri (7) pomwe ili ndi mapointsi 23 pa masewero 17 omwe yasewera mu ligi ya TNM.