MWANSA WATI AKUKHULUPILIRA KUTI ACHITA BWINO

Mphunzitsi watimu ya Moyale Barracks, Prichard Mwansa, wati akhulupilira kuti timu yake ichita bwino pa masewero amu FDH Bank mu ndime ya matimu anayi malingana ndi mmene timuyi yakonzekerera masewerowa.

Iye amayankhula patsogolo pa masewerowa awo ndi FCB Nyasa Big Bullets pa bwalo la Bingu lachitatu ndipo wati akudziwa kuti akhale masewero ovuta koma akufuna kufika mu ndime yotsiriza.

"Takonzekera bwino kwambiri masewero amenewa tikukhulupilira kuti mmene tapangira anyamata akupereka chilimbikitso kuti tichita bwino ndi kufika ndime ina nde tikayesetsa kuti tikachite bwino." Anatero Mwansa.

Timuyi tsopano ikufunitsitsa kufika mu ndimeyi chifikereni mu 2017 pomwe inasewera ndi Kamuzu Barracks mu chikho cha FISD Challenge ndipo anagonja.

Opambana pa masewero amenewa akuyembekezeka kukumana ndi timu ya Blue Eagles mu ndime yotsiriza.

Wolemba: Hastings Kasonga