"OYIMBIRA ANAYIMBIRA MOOPA ATAMENYEDWA" - CHIRAMBO

Mphunzitsi watimu ya Mzuzu City Hammers, Elias Chirambo, wati kumenyedwa kwa oyimbira ndi anthu a FOMO kunachititsa oyimbira kuyimbira mwa mantha ndipo zawononga masewerowa.

Chirambo amayankhula atatha masewero omwe agonja 2-1 ndi FOMO ndipo wati masewero anayenda bwinobwino koyambira koma mchigawo chachiwiri oyimbira amaopa kufa.

"Anali masewero abwino ndipo FOMO yagoletsa zigoli zabwino ifenso tagoletsa koma a FOMO akumumenya oyimbira mpaka ku dressing room nde mchigawo chachiwiri anayimbira mwa mantha chifukwa amaopa kufa poti chitetezo kunalibe." Anatero Chirambo.

Iye anatinso timu yawo imakonzekera masewero aliwonse mmene alili ndipo pa masewero awo otsatira azakonzekeranso bwino kuti adzapambane.

Timu ya Mzuzu City Hammers ili pa nambala yachitatu pa masewero asanu ndi anayi (9) omwe yasewera ndipo yatolera mapointsi 16 mu ligi.