"CHIPAMBANO CHITITHANDIZA KUCHOKA KUMUNSI" - KAFOTEKA

Wachiwiri kwa mphunzitsi watimu ya Extreme FC, Elvis Kafoteka, wati masewero awo ndi timu ya Mighty Wakawaka Tigers lachiwiri akhale ofunikira kwambiri pomwe awaonetse tsogolo lowala loti atsalebe mu ligi ya TNM chaka chino.

Kafoteka amayankhula izi patsogolo pa masewerowa omwe alipo pa bwalo la Nankhaka ndipo wati wawauza osewera kuti akaikepo mtima kuti apambane mmasewerowa.

"Ndi masewero ofunikira kutimu yathu mwina kuposa ena aliwonse chifukwa tikapambana tiyandikira matimu atatu ndipo titseka mpata omwe unalipo ndekuti ulendo ofuna kutsala mu ligi ukhale owala. Pali masewero omwe timagonja chifukwa anyamata sanaikirepo mtima koma awa okha tawapempha kuti aikepo mtima." Anatero Kafoteka.

Timu ya Extreme ikuchokera kufanana mphamvu ndi Silver ndipo sikhala ndi Frank Sanudi pokumana ndi Tigers kamba ka zikalata zachikasu zitatu. Iyo ili pansi pa ligi ndi mapointsi 14 pa masewero 19.

#Tawonga2023