KAFOTEKA WATI SIKUNATHE KWA EXTREME

Mphunzitsi watimu ya Extreme FC, Elvis Kafoteka, wati timu ya Extreme FC sinatuluke mu ligi ndipo izikokera mmasewero omwe atsalawa kuti achoke ku chigwa cha matimu otuluka.

Kafoteka wayankhula izi timu yake itagonja ndi Dedza Dynamos ndi chigoli chakumapeto cha Charles Chipala pa bwalo la Civo pomwe wati akusowa chokamba poti samayenera kugonja. Iye wati timu yake ikufunika anyamata ena wowonjezera ndipo wati akadali ndi mwayi wokhazikika mu ligi.

"Mwayi ndi wambiri, apapa tatsala ndi masewero awiri mu chigawo choyamba ndipo tili ndi chigawo chachiwiri pomwe tikokere ma pointsi. Sindikudera nkhawa, anyamata akusewera bwino koma akungosowa kuikapo mtima omwe utipangitse kuti tizichita bwino." Iye anatero.

Chiyambireni ligi ya chaka chino, Extreme yapambana masewero amodzi ndi Wanderers ndipo yakwanitsa kupeza mapointsi 6 pa masewero 13 omwe yasewera mu ligiyi.