"SINDINAGANIZIREKO ZOTI TITULUKA" - CHIRAMBO

Mphunzitsi watimu ya Ekwendeni Hammers, Elias Chirambo, wati ndi wokondwa kamba koti timu yake yatsala mu ligi ya TNM Supa ligi ya chaka chino ndipo wati sanaganizireko zoti atuluka mu ligi.

Iye amayankhula izi atatha masewero omwe agonjetsa Dedza Dynamos 2-1 kuti apulumuke mu ligi ndipo wati anyamata ake analimbikira kwambiri mmasewerowa.

"Anali masewero abwino kwambiri ndipo tithokoze Mulungu kuti tapambana ndipo tili pa mapointsi 36, sindinaganizireko zotuluka mmutu mwangamu kungoti kumpoto tili ndi matimu abwino kwambiri koma kuti thandizo ndi lomwe limasowa kwambiri." Anatero CHIRAMBO.

Timu ya Ekwendeni Hammers inali imodzi mwa matimu omwe anali pa ngozi yotuluka koma chipambanochi chawafikira pa mapointsi 36 pa masewero 30 pa nambala 12.

Wolemba: Hastings Wadza Kasonga Jr

MPHUNZITSI WAYIMITSIDWA KAMBA KOSOWA KHALIDWE

Timu ya Ekwendeni Hammers yaimitsa wachiwiri kwa mphunzitsi wawo, Luckson Mauluka Nyoni, kamba ka zifukwa zosowa mwambo malingana ndi timuyi.

Timuyi yati mphunzitsiyu anachita zinthu zomwe sizinakomere timuyi pa masewero omwe anagonjetsa Civo United 3-2 pa bwalo la Rumphi sabata yatha ndipo mpake amuyimitsa.

Koma poyankhapo, Nyoni wati sakudziwa za nkhaniyi poti sanalandire kalata iliyonse komanso kuti anatsanzika pamasewero omwe timuyi inagonja 3-1 ndi Silver Strikers basi.

Mauluka ndi mmodzi mwa aphunzitsi omwe akhalitsako kutimuyi kuchokera mu chaka chomwe inalowa mu ligi ndipo timuyi ikumenyera nkhondo yoti isatuluke mu ligiyi.

Source: Wa Mpira

MATIMU AKUMPOTO AKUKANIRANA KUTULUKA

Nkhondo yozimenyera nkhondo yotsala mu ligi ya TNM yavuta kwambiri pomwe timu ya Ekwendeni Hammers yakankhira ku chigwa cha matimu otuluka timu ya Moyale Barracks kutsatira kugonjetsa Civo 3-2 pa bwalo la Rumphi lachitatu.

Sammy Phiri, Wongani Lungu ndi Blessings Singini anagoletsa zigoli za Hammers pomwe Binwell Katinji ndi John Dambuleni anamwetsa za Civo zomwe zinakondweretsa mphunzitsi wa Hammers, Elias Chirambo.

"Tithokoze Mulungu kuti anali mbali yathu komanso tiyamike anyamata kuti asewera bwino mpaka tapambana. Tinali koti titha kutuluka koma tachokako, masewero atsalawa tiyesetsa kuti tidzapambanenso." Anatero Chirambo.

Asanayambe masewerowa, Hammers inali pa nambala 14 koma kutsatira kupambanaku, iwo afika pa nambala 11 ndi mapointsi 33 pa masewero 29 mu ligiyi.

Wolemba: Hastings Wadza Kasonga Jr

"TIZIBWANA PANG'ONO TATIPWETEKETSA" - MAULUKA

Wachiwiri kwa mphunzitsi watimu ya Ekwendeni Hammers, Luckson Mauluka Nyoni, wati timu yake inangochita zibwana pang'ono zomwe zachititsa kuti agonje pomwe amasewera ndi Red Lions.

Iye amayankhula atatha masewero omwe agonja 1-0 pa bwalo la Balaka ndipo wati timu yake inali bwino mchigawo choyamba koma Lions inasintha zinthu mu chigawo chachiwiri.

"Anali masewero a zigawo ziwiri, mu chigawo choyamba tinasewera bwino moti tinapeza mipata yochuluka yoti tikanatha kugoletsa koma chigawo chachiwiri Red Lions inabwera, analowetsa winawake kumbaliku yemwe anasinthadi zinthu, ndi tizibwana tinachinyitsa." Anatero Mauluka.

Timu ya Ekwendeni Hammers tsopano ili nawo pa ngozi yoti itha kutuluka mu ligi ya TNM pomwe ili ndi mapointsi 30 pa masewero 27 ndipo ali pa nambala 13 mu ligiyi.

Wolemba: Hastings Wadza Kasonga Jr

"OSEWERA ANAKOMEDWA NDI SAPOTI YA PANJA" - MAULUKA

Wachiwiri kwa mphunzitsi watimu ya Ekwendeni Hammers, Luckson Mauluka Nyoni, wati osewera atimu yake anakomedwa ndi ochemerera nthawi yomwe anapeza chigoli chawo zomwe zinachititsa kuti atayilire.

Iye amayankhula izi atatha masewero omwe alepherana 1-1 ndi FCB Nyasa Big Bullets ndipo wati mipata yomwe anaipeza akanagoletsa zikanatha kuwachitira ubwino.

"Anali masewero abwino kwambiri tinapeza mipata yoti tikanagoletsa tikanatha kupambana komabe sizinatheke komabe zotsatira izizi zitilimbikitsa. Atapeza chigoli anakomedwa ndi phokoso la ochemerera nde anatayilira." Anatero Mauluka.

Iye wati timu yake sikungoyang'ana zotsala mu ligi koma kuti ithere mu matimu 8 oyamba mu ligi. Iwo ali pa nambala 13 ndi mapointsi 30 pa masewero 26.