"MZUZU IKUFUNIKIRA BWALO NGATI LA BINGU" - NYAMILANDU

Mtsogoleri wa bungwe la Football Association of Malawi, Walter Nyamilandu Manda wauza akuluakulu a komiti yoyang'ana za Club Licensing kuti apange chiganizo pa zakutsegulidwa za bwalo la Mzuzu pasanathe masiku awiri kuyambira lero.

Nyamilandu wayankhula izi atatha kuyendera bwaloli lachinayi ndipo waonetsa kukhutira ndi ntchito yomwe khonsolo ya Mzuzu yagwira pokonza bwaloli.

"Ndilibetu vuto ndi bwaloli ndipo apa pakhonza kuseweredwa komanso akwanilitsa zonse zomwe anapemphedwa kuti achite. Padakali pano likhonza kuyamba kuchititsa masewero komabe Mzuzu likufunikira bwalo la pamwamba." Anatero Nyamilandu.

Iye wati oyendera bwaloli kuti apereke chiganizo pa bwaloli pasanathe masiku awiri. Akuluakulu a komiti ya Club Licensing anayendera bwaloli lachiwiri lathali.

Source: Times

"TASEWERA BWINO KWAMBIRI NDI BULLETS" - NKHOMA

Mphunzitsi watimu ya Lipulumundu FC, Limbani Nkhoma, wati samayembekezera kuti timu yake isewera mwapamwamba ndi timu ya FCB Nyasa Big Bullets ndipo wati ndi wokhutira ndi anyamata ake.

Iye amayankhula atatha masewero omwe agonja 2-0 pa bwalo la Kamuzu ndipo wati anyamata ake anachilimikira poyimitsa Bullets mchigawo chonse choyamba.

"Anyamata asewera bwino kwambiri ndipo sindimayembekezera kuti angachite chonchi, kungogonja 2-0 yokha basi komanso zigoli za chigawo chachiwiri ndekuti anyamata anagwira ntchito nde ineyo ndine wokondwa ndi mmene asewerera." anatero Nkhoma.

Timu ya Bullets inapeza zigoli kudzera mwa Thomson Magombo komanso Chawanangwa Gumbo kuti ifike mu ndime ya matimu 32 a chikho cha Castel Challenge Cup. Lipulumundu imasewera mu Division One ya ku mmwera ndipo kwawo ndi ku Mangochi.

Wolemba: Hastings Wadza Kasonga Jr

"TILIMBIKIRA MASEWERO OMWE ATSALAWA" - MASAPULA

Wachiwiri kwa mphunzitsi watimu ya Red Lions, Chifundo Masapula, wati timu yake ilimbikira masewero awo omwe atsala nawo kuti mwina angathe kutsala mu ligi ya TNM.

Iye amayankhula atatha masewero omwe agonjetsa Ekwendeni Hammers 1-0 ndi chigoli cha Humphreys Minandi ndipo wati ananena kale kuti ligi siyinathe.

"Tithokoze osewera athu kamba kosewera mwapamwamba, tithokozenso Mulungu kamba ka chipambanochi, ndinkanena kuti ligi siyinathe nde apapa tangotsala ndi masewero awiri nde tiwakonzekere bwino kuti tichite bwino." Anatero Masapula.

Patsogolo pa masewero awo ndi FCB Nyasa Big Bullets, iye wati awakonzekera masewerowa poti kutola mapointsi mmasewerowa kudzawachitira ubwino waukulu. Iwo adakali pa nambala 15 ndi mapointsi 28 pamasewero 28 amu ligiyi.

Wolemba: Hastings Wadza Kasonga Jr

"TIZIBWANA PANG'ONO TATIPWETEKETSA" - MAULUKA

Wachiwiri kwa mphunzitsi watimu ya Ekwendeni Hammers, Luckson Mauluka Nyoni, wati timu yake inangochita zibwana pang'ono zomwe zachititsa kuti agonje pomwe amasewera ndi Red Lions.

Iye amayankhula atatha masewero omwe agonja 1-0 pa bwalo la Balaka ndipo wati timu yake inali bwino mchigawo choyamba koma Lions inasintha zinthu mu chigawo chachiwiri.

"Anali masewero a zigawo ziwiri, mu chigawo choyamba tinasewera bwino moti tinapeza mipata yochuluka yoti tikanatha kugoletsa koma chigawo chachiwiri Red Lions inabwera, analowetsa winawake kumbaliku yemwe anasinthadi zinthu, ndi tizibwana tinachinyitsa." Anatero Mauluka.

Timu ya Ekwendeni Hammers tsopano ili nawo pa ngozi yoti itha kutuluka mu ligi ya TNM pomwe ili ndi mapointsi 30 pa masewero 27 ndipo ali pa nambala 13 mu ligiyi.

Wolemba: Hastings Wadza Kasonga Jr

"IKANAKHALA LIGI YATHA SIBWENZI TIKUMENYA MASEWERO" - M'GANGIRA

Wachiwiri kwa mphunzitsi watimu ya Silver Strikers, Peter M'gangira, wati timu yake ikuyang'anabe mwachidwi masewero awo omwe akusewera ndipo wati ligi siyinathe.

Iye amayankhula atatha masewero omwe timuyi yagonjetsa timu ya Chitipa United 1-0 pa bwalo la Karonga ndipo wati ndi okondwa kamba koti akhala timu yoyamba kugonjetsa Chitipa pa kwawo.

"Ndife okondwa kamba koti tapambana, awa ndi masewero oyamba kugonja panopa koma tasewera bwino, tinapeza mipata yochuluka komabe tapeza chigoli cha changu. Chilichonse chikhonza kuchitika, ikanakhala kuti ligi yatha sibwenzi tikusewerabe masewero." M'gangira anafotokoza.

Timu ya Silver Strikers tsopano ili ndi mapointsi okwana 50 pa masewero 27 omwe yasewera ndipo ili pa nambala yachitatu mu ligiyi.

Wolemba: Hastings Wadza Kasonga Jr

Prediction 0-2 prediction

Prediction 1-3 prediction

Prediction 1-0 prediction💯

Prediction 1-0 prediction💯

Prediction 3-1 prediction